पेज थ्री पिपुल्स च्वइस अवार्डया नोमिनेशन दुनेया पुलुपालु

विजयरत्न असंबरे

नेपालभाषा संगीत ख्यलय् गबलें धेंधेंबल्लाः कासा व गबलें सिरपाः ज्याझ्वः जुयाच्वनी। तर म्युजिक भिडियो व नेवाः फिल्म ख्यलय् आः तक मजूनि। आः जुइत्यंगु दु। पेज थ्री बाछिपौया ग्वसालय् न्हापांखुसी जुइत्यंगु 'पेज थ्री पिपुल्स च्वइस अवार्ड' य् नेवाः गीत-संगीतया नापनापं मनोरञ्जनया स्वंगुलिं ख्यलय् सिरपाः ज्याझ्वः जुइत्यंगु दु। थ्वहे सिरपाः ज्याझ्वलय् सिरपाः निर्णय यायेत ग्वाहालि जुइ कथं छगु 'नोमिनेशन' घोषणा ज्याझ्वः धाःसा जुइधुंकल। नोमिनेशनया घोषणा धुंकाः एसएमएस भोटिंग नं शुरु जुइधुंकल। ग्वसाः खलःया भाजु दर्शनवीर शाक्यया कथं एसएम एम भोटिंग तसकं उत्साहजनक रुपं जुयाच्वंगु खनेदु। वंगु शुक्रवाः नोमिनेशन पिदंगु दिं कुन्हु उलि एसएमएस मजू तर शनिवाः निसें अप्वया वःगु खनेदु।
नेपालभाषाया मनोरञ्जन ख्यः विशेष यानाः गीत संगीत न्हापांनिसें नुगलय् नुगलय् दुबिनाच्वंगु विधा खः। आः वयाः म्युजिक भिडियो व नेवाः फिल्मया ख्यः नं न्हियान्हिथं तब्या जुया वयाच्वंगु दु। ने.सं. १११६/१७ पाखे म्युजिक भिडियो धइगु हे मदुनि। अथे जूगुलिं गुडनाइट एफ.एम.या सछिन्हु क्यंगु लसताय् जूगु सांगीतिक ज्याझ्वलय् थीथी गायकतय्सं हाःगु म्येँ व मेमेगु साँस्कृतिक ज्याझ्वःया लुया भरय् ज्याझ्वः न्ह्याकेमाःगु खः। नेपालभाषा संगीत ख्यलय् अभाव जुयाच्वंगु म्युजिक भिडियोया पलाः अबाय्ति हे श्रीगणेश जूगु खः। अबाय्ति नील शाक्यं हालातःगु म्येँ 'लुमंकाच्वना छंत जिं' या म्युजिक भिडियो दयेकेगु ह्वःताः थ्व हे च्वमियात वःगु खः। उगु म्येँय् मय्जु रेणु बज्राचार्यं मोडल जुयाः ग्वाहालि यानादीगु खः। थुकथं नेपालभाषाया संगीत ख्यलय् न्हापांगु म्युजिक भिडियो शुरु जूगु ई निसें आः तकया झन्यादँ दुने आपालं नेवाः म्युजिक भिडियो खने दये धुंकल। अले आः वयाः अथे पिदंगु म्युजिक भिडियोया थीथी विधाय् सिरपाः नं वइगु खं थ्व ख्यःया नुगः लसतां जायाच्वंगु खनेदु ।

उत्कृष्ट म्युजिक भिडियो विधाय् 'च्वने नु' व 'यःसां मयः पह यायेमते' निपु निपु म्येँ नोमिनेशनय् लानाच्वंगु एल्बम 'ल्वःवन'या सम्पादक सर्जु पिखां थ्व विधाय् लूज सिंह (ल्याय्म्हम्ह भाजु), जितेन्द्र महर्जन (यौवनया हिसि) लिसे सिरपाःया निंतिं धेधेंबल्लाः यानाच्वंगु दु। म्युजिक भिडियोपाखेया न्यागुलिं विधाया नोमिनेशनय् 'ल्वःवन' या नां खने दयाच्वंगु दु। अथे हे तुं यौवनया हिसि, छ हे छम्ह दु, हिसि दुगु मिखा, आः स्वयेगु मखुला उत्कृष्ट म्युजिक भिडियोया धेंधेंबल्लाखय् लानाच्वंगु दु। म्युजिक भिडियोया उत्कृष्ट निर्देशनय् सुरोज महर्जन सुनां 'जितः धाः वइ', 'यौवनया गाच्वः' निपु म्येँय् नोमिनेशनय् लानाच्वंगु दु। थ्व विधाय् 'च्वये नु'या देवकुमार श्रेष्ठ व 'ल्वापु जुइ जिम्थाय् छेँय्'या रामकृष्ण खड्गीं हाथ्या बियाच्वंगु दु ।

नोमिनेशन घोषणा जूगु दिं कुन्हु थ्व ख्यःया सकलें मनूतय्गु ख्वालय् न्हिलासू खनेदु। 'यांमिखा' व 'याकः म्ह्याय्'या निंतिं निगू उत्कृष्ट मिसा कलाकार मू भूमिकाया निंतिं नोमिनेशनय् लाःम्ह भिंतुना जोशीया ला म्हुतु प्वाः हे कमतिउ धाःसां पाइ मखु। अथे हे तुं 'मिजं' फिल्मया निंतिं उत्कृष्ट स्क्रीनप्लेया नोमिनेशनय् लाःम्ह सुरजवीर बज्राचार्य भाजुया नं लसता बयान यायेथाय् हे मदु। 'जिपिं थेंज्याःपिं जुनियर मस्त नं थथे नोमिनेशनय् लाये यः खनिं का !' धाधां वास्यां न्हिउम्ह सुरज भाजुया म्हुतु नं चाःगु चालं तुं। म्येँ च्वमि व पिकाकः जीवनलाल मास्कें थःगु म्येँचाः उत्कृष्ट संगीत एल्बमय् लाःगुयात कयाः 'जितः ला थथे नोमिनेशनय् लाःगु हे तःधं जुल बा !' धकाः प्रतिक्रिया प्वंकादिलसा 'जिन्दगीया सवाः' या निंतिं उत्कृष्ट संगीतकारया नोमिनेशनय् लाःम्ह वरिष्ठ संगीतकार गोविन्द ह्युमतं ला थः अथे नोमिनेशनय् लाःगु खनाः अजूचासें धयादिल, 'जि ला थथे नोमिनेशनय् लाइ अले दसिपौ बी धकाः मती हे मतसे वयागु। वा धकाः फोन याना हःगुलिं जक वयागु ।'

क्रिसमसया दिं क्रिस्चियन धर्मालम्बीतय् तःधंगु नखः कुन्हु थ्व नोमिनेशन ज्याझ्वः जूगु इलय् नेवाः संगीत, म्युजिक भिडियो व नेवाः फिल्म ख्यःया नं छगू नखः हे थें लकस खने दत। ज्याझ्वलय् ख्यालि जुजु मदनकृष्ण श्रेष्ठ नं थ्यं। अझ ला मू पाहांया भाला क्वबियातःम्ह चेम्बर्स अफ कमर्सया नायः सुरेन्द्रवीर मालाकार लिमलाःगु हुनिं नोमिनेशनय् लाःपिं सकसितं मदनकृष्ण श्रेष्ठं हे दसिपौ इनादीगुलिं ज्याझ्वः झन् हे संगीतमय जुया बिल। नोमिनेशन घोषणा जूगु न्हि कुन्हु हे नेपालभाषाया साहित्य व कला ख्यलय् न्यय्दँ न्ह्यवंनिसें उतिग्यंक पलाः न्ह्याका वयाच्वंम्ह हनेबहम्ह रामशेखर नकःमियात 'लाईफ टाइम एचिभमेन्ट अवार्ड' बीगु घोषणा जूबलय् अन सकसिनं लापा थानाः लसकुस यात ।

आः थ्वहे ने.सं. ११३० पोहेलागा चःर्‍हे (पौष ३०) कुन्हु छगू तःजिगु ज्याझ्वःया दथुइ थुकिया सिरपाः इनेगु ज्याझ्वः जुइत्यंगु दु। वकुन्हु आः नोमिनेशन जूगु म्येँ मध्ये सुनां सुनां सिरपाः त्याकी धइगु ला स्वये हे ल्यं दनि। अथे खःसां म्येँया उत्कृष्टता व स्वकुमितय्सं ययेकूगु स्वयेबलय् अबलय् सिरपा त्याकूम्ह छम्ह जक मखु आः नोमिनेशनय् लाःपिं सकलें हे वास्तवय् सिरपाः त्याःपिं खः धकाः धाःसां छुं मपाः ।

More Stories Like this