वास्तविक सुखया आधार: धर्माचरणया उपहार

लोकबहादुर शाक्य

सतत जागरुकता:

धर्म आदर्श जीवनया आधार खः। सकल मनूया सुखपूर्वक जीवन हनेगु मनसुवा जुयाच्वनी। अप्वःसिनं यथार्थ सुख मसियाः मखुगु सुखपाखे न्ह्यज्याइगु जुल। धात्थेंयागु सुख दुनेया शान्तिइ दु। शान्ति चित्तया निर्मलताय् दइगु जुल। क्लेश मदुगु चित्तया अवस्था हे यथार्थ सुख-शान्तिया अवस्था खः। निर्मल चित्तया आचरण हे धर्म खः। मनय् द्वेष, मोह, लोभ, भय पिदन कि सुख दइ मखुत। अले जबर्जस्ती, खुया कायेगु व्यभिचार, झूठ, छलकपट चुगली, परनिंदा, आदि भावना पिदनाः दुःख सियाच्वनीगु जुल। मन व्याकुल जुयाः अशान्त लकस ब्वलनाच्वनी। उकिं थज्याःगु लकसपाखें बचे जुइत थःगु पलपलया ज्याखँय् होस तयाः जागरुक जुयाः दोष मुक्त याना तयेगु कुशल कर्म जुल। धर्म धारणाया सही अभ्यास नं थ्वहे धकाः ध्वाथुइके माल।

थः व कतः सुखी याइ भिं ज्यां

आचार्य सत्यनारायण गोयन्का कृत 'धर्म आदर्श जीवनया आधार' सफू कथं गुगुं नं ज्या याये न्ह्यव तथा यानाच्वनेबलय् थ्व ज्यां थःत व मेपिंत मंगल जुइ मजुइ बिचाः यायेमाःगु जुयाच्वन। मंगल जुइगु जूसा यायेगु नत्र मयायेगु क्वःछी माल। विवेक बुद्धिं जाँच यानाः ज्या यायेगु सर्व प्रकारं मंगल जुइ। गबलें असावधानीपूर्वक ज्या यानाः अकुशल ज्या जूवंसां दुःख मतासे प्रायश्चित यानाः पासापिं अथवा कल्याणमित्रपिं नाप स्वापू तयाः थःगु भूल स्वीकार यानाः सुझाव कायेगु उत्तम उपाय जुल। लिपा लिपा अप्वः सावधान जुयाः ज्या यायेगु कृतसंकल्प यानाः सुधार जुइगु वैज्ञानिक तरिका नं खः। थन नं ध्वाथुइके माःगु दु कि झीगु सत्कर्म तथा दुष्कर्म झीत तक सुखी दुःखी याइगु मखु नाप च्वंपिं तथा पासापिंत नं प्रभाव लाकीगु जुयाच्वन। मनूत समाजया मेपिं दुजःपिं नाप नं च्वनाच्वनी। थ्व समाजया अविभाज्य अंग खः। समाजपाखें थःपिंत व मेपिंत नं लिच्वः लानाच्वनी। उकिं धर्मं साधनपाखें थःपिनि नैतिक जीवन निर्वाह जुइगु जक मखु दुष्कर्मीतय्त नं सत्कर्मया लिच्वः लाकाः भिंगु लकसय् दुथ्याका तइगु जुल ।

निश्चिन्त भविष्य: वर्तमान सुधार

जीवन व्यवहारया मूल्यांकन यायेत धर्म साधना खः। धर्म चर्यापाखें जीवनस्तर उँचा मजूसा, लोक व्यवहार सुधार मजूसा, मंगलमय जीवन मजूसा, धर्म छु ज्या यायेत धकाः न्ह्यसः तयेमाःगु अवस्था नं जुइफु। यथार्थ रुपं चिन्तन मनन यायेमाःगु ला धर्मपाखें परस्पर स्वापू सुधार यायेगु खः। परिवार, समाज, जाति, राष्ट्र, अन्तर्राष्ट्रिय आदि दक्व परस्पर सम्बन्ध व्यक्ति-व्यक्तिपाखें जुयाच्वनीगु जुल। अतः शुद्ध धर्म थ्वहे खः कि हरेक मनुखं जीवनय् मेपिं नाप व्यवहार सम्बन्ध सुधार यायेमाल। धर्म धइगु थ्वहे जीवनय् सुख-शान्तिपूर्वक निर्वाह यायेत खः। मरण लिपा अज्ञात स्वर्गया भोग यायेत मखु। अन्जान नरकं बचे जुइत नं मखु। भविष्यया चिन्ता मकासे वर्तमान सुधार यात कि भविष्य स्वतः सुधार जुइगु जुल। धर्म सकलसित थ्व हे जीवनया सुख-शान्तिमय दयेकीगु हेतु खः। अझ धर्म धइगु थःगु व परकल्याणया कारण सम्झे जुयाः पालन यायेमाःगु जुल।

सम्प्रदाय निरपक्ष: धर्मया अपेक्षा

शुद्ध वायुमण्डलय् च्वनेगु, शुद्ध फय् सेवन यायेगु, म्ह सफा यायेगु, शुद्ध सात्विक भोजन यायेगु सकलसित हितकर जुइगु जुयाच्वन। अशुद्ध, अस्वस्थ लकसय् च्वन कि, म्ह व वसः नवयेका तल कि, दुषित भोजन यात कि, स्वास्थयात हानि जुइगु जक मखु रोगी तथा दुःखी नं जुइगु जुल। थुगु हे कथं मन असन्तुलित जुयाः व्याकुल जुल कि रोगग्रस्त नं जुइफु। स्वास्थ्य विज्ञानया सामान्य नियम सकलया म्ह व चित्तय् समानरुपं प्रभाव परे जुइगु ल्वःमंके मजिल। धर्म आदर्श जीवनया शैली खः। सुखपूर्वक जीवन निर्वाह यायेगु पावन पद्धति खः। शान्ति प्राप्त यायेगु विमल विधा खः। अले सर्वजनकल्याणी आचारसंहिता खः। शीलवान, समाधिवान, प्रज्ञावान अनाशक्त जुइगु तथा प्रेम, करुणा, जनसेवा, सामाजिक समान भावना ब्वलंकेगु बौद्धतय्गु निंतिं जक मखु हिन्दू, जैन, ईसाइ, मुसलमान आदि सकल धर्मावलम्बीतय् निंतिं नं खः। धर्मपालनया तातुना धइगु मनूत सच्चा मनू जुयाः मनुष्य जीवन सफल कथं हनेगु जुल ।

विश्वशान्तिया निंतिं धर्म समन्वय

सुखी दुःखी जुइगु नं चित्तया खेल धाये माल। मू खँ ला मनुष्य जीवन सफल कथं हनेत शील समाधि प्रज्ञा चर्या मदयेकुसें मगाः। धर्मचित्त उत्पन्न यानाः विश्व शान्तिया निंतिं योगदान यायेत वज्रयान सम्प्रदायया मू आधार सर्वप्रकारं जगतहित समानता, धर्म समन्वय लुमंके बह जू। थः जक भिनाः नं मगाः परिवार जःलाखःला समाजय् देशय् च्वंपिं सकलयात फुकथं सेवा यायेगु मनोवृत्ति दयेकेगु बोधिसत्व चर्या जुल। समुन्नत तथा शान्तिपूर्ण समाज सिर्जना यायेत मैत्री, करुणा, मुदिता, उपेक्षा भावना ब्वलंकेगु अनिवार्य जुयाच्वन। थुगु लँपुइ वंगल जुयाच्वनीगु असमान भावना खः ।

उकिं थः व कतःयागु मखु धकाः चिन्तन मनन यानाः समान दृष्टिकोण तल कि लोक कल्याणकारी ज्या याये फइगु जुल। हनेबहम्ह गोयन्काजुया अतिकं उच्चस्तरया उक्ति 'हिन्दु धर्म धर्म मखु, क्रिश्चियन धर्म धर्म मखु, धर्म धर्म खः' । थ्व देशनाया तातुना धइगु छगू जक धर्मय् आशक्त जुयाः मेगु धर्मयात समान मखन कि साम्प्रदायिक भावना जुइगु जुल। अझ दक्व धर्मया तातुना धइगु 'कुशल, मंगल, सेवा ज्याखँ यायेगु, मैत्री, करुणा समान, भावना तयेगु' खः। उकिं थःगु धर्म जक तःधं धइगु भावना मतसे दक्व धर्मयात समान दृष्टिकोण तयाः समन्वयात्मक भावना ब्वलंकाः विश्व शान्तिया नितिं योगदान बी माल ।

More Stories Like this