सहमति यायेत कांग्रेस-एमाले मुँज्या
माओवादी न्हूगु ज्याझ्वःपाखे
येँ (सन्ध्या टाइम्स)/राजनीतिक गतिरोध अन्त्यया निंतिं सत्तारुढ पार्टीत नेपाली कांग्रेस व एमालेया नेतातय् दथुइ थौं सनिलय् सहलह ब्याकीगु जूगु दु। म्हिगः नं माओवादीया माग व आन्दोलन नापं राजनीतिक गतिरोध अन्त्यया निंतिं निगू दल दथुइ सहलह ब्याकेगु ज्या जूगु खःसा थौं नं उकियात निरन्तरता बीत्यंगु खः। थःपिनि दथुइ सहमति जुइधुंकाः जक माओवादी नेतातलिसे सहलह ब्याकेगु धकाः एमाले-कांग्रेस सहलहयात तीव्र याःगु खँ धाःगु दु। कांग्रेस संसदीय दलया ज्याकुथी उगु कथं मुँज्या च्वनेत्यंगु खः।
माओवादीया मेगु हे मुँज्या कांग्रेस-एमाले दथुइ सहमति दयेकेगु कुतः जुयाच्वंगु इलय् उखे एनेकपा (माओवादी) धाःसा आः न्हूगु चरणया आन्दोलनया स्वरुप दयेकेगु ज्याय् व्यस्त जुयाच्वंगु दु। म्हीगंनिसें न्ह्यानाच्वंगु पोलिटब्यूरो बैठक आन्दोलनया स्वरुप तयार यायेगु ज्याय् व्यस्त जुयाच्वंगु खः। बैठकय् माओवादी अध्यक्ष प्रचण्डं आन्दोलनया खाका न्ह्यब्वयादीगु खः ।
उकी भ्रष्टाचार व भारतीय विस्तारवाद विरुद्ध राष्ट्रिय जागरण अभियान न्ह्याकेगु प्रस्ताव दुसा उकियात कन्हसंनिसें च्वनीगु केन्द्रीय बैठकं अनुमोदन यानाः सार्वजनिक याइगु खँ दु ।
