'नेवाःतय्सं नेतृत्व यायेमाः'
प्रम प्रचण्डयात नेवाःतय् अवधारणापत्र
जातीय आधारय् संघीय राज्य दयेकेगु ज्याया नेतृत्वदायी भूमिका नेवाःतय्सं म्हितेमाःगु खँ प्रधानमन्त्री पुष्पकमल दाहाल प्रचण्डं धयादीगु दु । थौं सुथय् नेवाः स्वायत्त राज्यया अवधारणपत्र लःल्हायेत वंगु नेवाः स्वायत्त राज्य मंकाः संघर्ष समितिया पुचःलिसे खँ ल्हासें वय्कलं थ्व खँ धयादीगु खः ।
संघर्ष संमितिया अवधारणा न्हूगु संघीय संरचना दयेकेगु निंतिं लँपु जुइगु बिचाः प्वकादिसें वय्कलं उगु अवधारणय् थःगु ऐक्यवद्धता नं प्वंकादिल ।
प्रम प्रचण्डं संघीयता व स्वायत्तताया खँ माओवादीं हे ल्ह्वनागु खः धासें उकिया निंतिं हे थःपिंसं त्याग व बलिदान यानागु बिचाः नं प्वंकादिल । संघीयताया गज्याःगु मोडेल दयेकेगु धइगु खँ जक ल्यं दनि धासें वय्कलं नेवाःत छप्पँ जुयाः संघर्ष समिति नीस्वंगु प्रति थः सकारात्मक जुयागु बिचाः नं प्वंकादिल ।
प्रतिनिधि मण्डलया दुजः व नेवाः देय् दबूया नायः मल्ल के. सुन्दरं मंकाः संघर्ष समिति स्थापना लिपा संघर्ष समितिं पूवंके धुंकूगु गतिविधि बारे जानकारी बियादिल । लिसें प्रतिनिधि मण्डलं माओवादीया सभासद्तय्त मंकाः अवधारणय् सकारात्मक भूमिका म्हितकेगु निंतिं माओवादी अध्यक्ष व प्रधानमन्त्रीपाखें पहल जुइगु आशा व्यक्त यानादिल । उगु ज्याझ्वलय् अर्थमन्त्री डा. बाबुराम भट्टराई नं दीगु खः ।
समितिया नायः दिलबहादुर श्रेष्ठया नेतृत्वय् वंगु उगु प्रतिनिधि मण्डलय् नेवाः देय् दबूया नायः मल्ल के. सुन्दर, नेवाः राष्ट्रिय मुक्ति मोर्चाया अध्यक्ष हितमान शाक्य, छ्यांज्ये सुरेश श्रेष्ठ, नेवाः देय् दबूया न्वकु व संघर्ष समितिया छ्याँजे नरेश ताम्रकार, नेवाः जागरण माचया संयोजक सुजिव बज्राचार्य, नेपाः लोकतान्त्रिक नेवाः संघया सानुराजा शाक्य, नेपाः राष्ट्रिय पार्टीया मनोज नेवाः व नेवाः देय् गुथि नेपालमण्डलया विष्णु चित्रकारिपं दुथ्याःगु खः ।
