मांभासं सपथ ग्रहणया प्रस्ताव

परमानन्द झाया खँय् सहलह

येँ (सन्ध्या टाइम्स)/व्यवस्थापिका संसदया थौं २ बजेनिसें च्वनीगु मुँज्याय् आवंलि राष्ट्रपति, उपराष्ट्रपति व प्रधानमन्त्रीं खय्भाय् बाहेक थःगु मांभासं नं सपथ ग्रहण याये दइगु प्रावधान तयेगु निंतिं विधयेक प्रस्तुत यानाः सहलह ब्याकीगु जूगु दु ।

थौं सरकारपाखें हे संविधानया न्हय्क्वःगु संशोधन यायेगु कथं तयार याःगु विधेयकयात कयाः सहलह ब्याकेगु ज्याझ्वः संसदय् तयातःगु दु। उगु विधयेक पारित जुल धाःसा आवंलि राष्ट्रपति, उपराष्ट्रपति नापं प्रधानमन्त्रीं नं थःगु मांभासं (खय् भाय् बाहेक) शपथ ग्रहण याये फइगु अवस्था ब्वलनी ।

उगु प्रस्ताव न्हापा हे संसदय् हयेगु धकाः धया वयाच्वंगु जूसां दलया नेतातय् दथुइ सहलह मजुयाः प्रस्ताव हये मफयाच्वंगु खः ।

थ्वहे दथुइ सपथ ग्रहण भाषाया विवादं यानाः थःगु पदीय हैसियत तकं मदयेका च्वनेमाःम्ह निर्वमान उपराष्ट्रपति परमानन्द झाया विषययात कयाः एनेकपा (माओवादी) व मधेशी जनअधिकार फोरमया नेतातय् दथुइ थौं सुथय् सहलह जूगु दु। माओवादीया मुँज्या न्ह्यानाच्वंगु पार्टीया केन्द्रीय ज्याकू पेरिस डाँडाय् माओवादीया नायः प्रचण्ड नापं थीथी नेतापिं व फोरमया नायः उपेन्द्र यादव नापं थीथी नेताया दथुइ सहलह जूगु दु। फोरमं यदि परमानन्द झायायात उपराष्ट्रपतिया हैसियत मबिल धाःसा संसदया मुँज्याय् हे पंगः थनेगु जुइ धकाः ख्याच्वः बियाः वयाच्वंगु खः ।

उर्जा मन्त्रीयाके स्पष्टीकरण

येँ (सन्ध्या टाइम्स)/संविधानसभाया राज्यया शासकीय स्वरुप निर्धारण समितिं उर्जामन्त्री प्रकाशशरण महतयात स्पष्टीकरण कायेगु खँ क्वःछिउगु दु। थौं सुथय् च्वंगु उगु समितिया मुँज्यां उगु कथं उर्जा मन्त्रीयाके स्पष्टीकरण कायेगु धकाः खँ क्वःछिउगु खः ।

वंगु मंसीर १६ गते राज्यया शासकीय स्वरुप निर्धारण समितिया मुँज्याय् कार्यकारी अधिकार राष्ट्रपतियाके कि प्रधानमन्त्रीयाके धइगु खँयात कयाः विवाद जूगु इलय् भोट तयेगु तकं ज्या जूगु खः ।

अबलय् भोट तयाः छुं नं छगू पक्षया बहुमत मदयेवं दकलय् अप्वः मत वःगु आधारय् एनेकपा (माओवादी)या प्रस्तावयात छ्वयेगु निंतिं उगु समितिया सभापतिं निर्णय पुस्तिका ब्वनाः न्यंकाच्वंगु इलय् उर्जा मन्त्री प्रकाशशरण महतं उगु निर्णय पुस्तिका हे लाकाकाःगु खः। निर्णय पुस्तिका लाका काःगु विषययात कयाः सहलह ब्याकाः आः मन्त्रीयाके स्पष्टीकरण कायेगु खँ क्वःछिउगु खः।
अबलय् उगु कथंया घटना जुइवं माओवादीया सभासदतय्सं उर्जा मन्त्रीयात स्पष्टीकरण कायेमाः धकाः माग यानाः भ्वं तःगु खःसा व हे भ्वंया आधारय् सहलह ब्याकाः थौं उगु कथं खँ क्वःछिउगु खः। स्पष्टीकरण कायेगु धकाः खँ थौं क्वःछिउगु खःसा आःया अवस्थाय् वय्कः उर्जामन्त्री प्रधानमन्त्री नापं चीन भ्रमणय् वनाच्वंगु दु ।