सकस्यां आन्दोलनया अःपुगु उपाय: बन्द

सरकार समक्ष थःपिनि पेशागत हक हित सम्बन्धी थीथी माग तयाः आन्दोलन यानाच्वंपिं देय्या स्वास्थ्यकःमितय्सं नं म्हिगःनिसें थःपिनि सेवा ठप्प याःगु दु।स्वास्थ्यकःमितय् थ्व सेवा बन्दं यानाः नं सर्वसाधारण जनता हे प्रभावित जूगु दु ।

देशय् थौंकन्हय् न्ह्यागु हे पुचः व वर्गं नं थःपिनि माग न्ह्यःने तये माल धाःसा दकलय् सशक्त पलाःया रुपय् बन्दयात हे नालेगु बांमलाःगु चलन शुरु जुयाच्वंगु दु। राजनीतिक पार्टी, पेशागत संघ संस्था, व्यवसायी आदि फुक्क हे पुचलं राज्ययात दवाव बीगु लागिं बन्द हे दकलय् बांलाःगु व अःपुगु उपाय कथं नालेगु यानाच्वंगु दु। तर दुर्भाग्य, उमिगु थज्याःगु बन्दं यानाः धाथें लिच्वः लायेमाःगु राज्यं धाःसा छुं छफुति हे दवाव महसुस यानाच्वंगु दु। बरु उकिया लिच्वः कथं सर्वसाधारण जनतां धाःसा तसकं दुःख सी मालाच्वंगु दु। यातायात व्यवसायीया माग पूवंके माःसा गाडी बन्द, विद्यार्थीया माग पूवंके माःसा सतक बन्द, शिक्षकया माग पूवंके माःसा शिक्षण संस्था बन्द, कर्मचारीया माग पूवंके माःसा कलम बन्द, स्वास्थ्यकर्मीया माग पूवंके माःसा अस्पताल बन्द, न्ह्याम्हेसिया माग पूवंके माःसां न्हापां जुइगु हे बन्द। थ्व वास्तवय् जनतायात दुःख बियाः राज्ययात मार लाकेगु ज्या खः। हरेकसिया माग पूवंका बीगु लागिं जनतां बलिदान बी मालाच्वंगु दु। थःपिनि ज्यापाखें जनतायात गज्याःगु पीडा जुइ धइगु खँ आः सोचे याइपिं तकं मदयेधुंकल। छखे बन्द याइपिंसं थथे यानाच्वंगु दुसा उखे राज्यं नं अज्याःगु बन्दं जनतायात लाइगु पीडाया मूल्यांकन याये फयाच्वंगु मदुनि। बन्दपाखें बीगु दवावयात राज्यं गबलें महसुस हे मयाः। थज्याःगु अवस्थाय् बन्द ज्याझ्वःया छुं औचित्य जकं दनि ला ?

More Stories Like this