बौद्ध विद्वान तिलकमान गुभाजु

कृष्ण

लुम्बिनीइ वंगु पुस २ व ३ गते जूगु झिक्वःगु राष्ट्रिय बौद्ध सम्मेलनय् छगू न्हूगु पहःया ज्या नं जूगु खनेदत। थुगुसी न्हापांखुसी मोफसलया बौद्ध विद्वान तिलकमान गुभाजुयात धर्मोदय सभां धर्मोदय धम्म सम्मान प्रदान यात ।

पोखराया नयाँ बजारय् जन्म जूम्ह वय्कः मां सन्तमान गुभाजु व पद्मकुमारी गुभाजुया काय् खः। अनया हे राष्ट्रिय बहुउद्देश्यीय विद्यालयय् स्कुल जीवन शुरु यानादीम्ह वय्कः २०१८ सालय् प्राधानाध्यापक श्याम पन्तं बुद्ध जयन्ती समारोहय् सहभागी जुइत स्कुलया प्रतिनिधि कथं छ्वसांनिसें हे निरन्तर बुद्ध धर्म दर्शनया अध्ययन व अध्यापनय् लगे जुया च्वनादीम्ह खः। थः व गोपालमान कर्माचार्यपिं ८ कक्षाय् ब्वनागु इलंनिसें हे पोखराय् बुद्ध जयन्ती समारोह यायेगुली सक्रिय जुयाच्वनागु लुमन्ति वय्कःयाके दु। थ्वयां न्ह्यः तक खुक्वः स्वनिगःया विद्वानतय्त हे जक थुकथंया धर्मोदय धम्म सम्मान बिया वयाच्वंगु खः ।

बैशाख पूर्णिमा कुन्हु पोखराय् न्यायेकीगु बुद्ध जयन्ती २०१८ सालंनिसें मदिक्क यायेगु ज्याय् सक्रिय योगदान याना वयाच्वंगुयात कदर यानाः हे वय्कःयात थुगु सिरपाः स्वरुप नीद्वः तका दां नं लःल्हाःगु खः। तिलकमान गुभाजु पोखराय् न्यायेकीगु बुद्धजयन्ती समारोह न्यायेकेगु ज्याय् शुरुंनिसें हे सक्रिय जुयाच्वंम्ह खः। नापं वय्कः बुद्धविहार धर्मशिलापाखें पिदनाच्वंगु धर्म चक्षु लय्पौया नं प्रधान सम्पादक खः। धर्मोदय धम्म सम्मान व नीद्वः तका दां सिरपाः काये खनाः थः तसकं हे लय्तायागु खँ कनादीम्ह वय्कः थौंकन्हय् ६५ दँय् क्यनाच्वंगु दु। स्वम्ह काय् व कलाः नापं सुखपूर्वक पोखराय् हे जीवन हना च्वनादीम्ह वय्कः लुम्बिनीइ जूगु धर्मोदय सभाया झिक्वःगु राष्ट्रिय बौद्ध सम्मेलनय् गणतन्त्र नेपाःया न्हापांम्ह राष्ट्रिपति डा. रामबरण यादवया ल्हातिं धर्मोदय धम्म सम्मान काये खंम्ह न्हापांम्ह ब्यक्तित्व नं जूगु दु। लुम्बिनीया विकास तसकं हे लिपा लानाच्वंगु व गुरु योजना कथं आः जूसां याकनं थुकिया विकास निर्माण जुइमाःगु वय्कःया माग दु ।

धर्म निरपेक्ष देश घोषणा जुइ धुंकूसां आः तक नेपाली जनतां उकिया अनुभूति याये मखंगु गुनासो कनादीम्ह वय्कः नेपाली बौद्ध संघ संस्थात नं लुम्बिनीया विकासय् सक्रिय जुइमफुगु खँय् दुःख प्वंकादी। धर्म निरपेक्ष देश भारतया राष्ट्रिय झण्डाय् धर्मचक्र इंगित याःथें बुद्ध जन्म भूमि नेपाःया झण्डाय् नं छुं अज्याःगु हे विशेष चिं इंगित यायेमाःगु वय्कःया धारणा दु। वय्कः थीथी बौद्ध धर्म सम्बन्धी ज्याय् सक्रिय जुया च्वनादीगु दुसा थीथी इलय् थीथी पत्रपत्रिकाय् नं बौद्ध धर्म दर्शन विषयय् च्वसु च्वयेगु ज्याय् उलि हे सक्रिय जुयाच्वनादीगु दु। थुगुसीया धर्मोदय धम्म सिरपालं झन वय्कःयात मेमेगु नं बौद्ध धर्म दर्शनया प्रचार प्रसारय् सक्रिय जुइत हौसला प्रदान याःगु खँ वय्कलं 'सन्ध्या टाइम्स' नापंया खँल्हाबलय् कनादिल ।

More Stories Like this