लँ दयेकेत काःगु ध्यबा ग्व ?

सम्पादकजु,

येँ महानगरपालिकाया नुगःचु जुयाच्वंगु थाय् थनया २३ वडास्थित सिद्धिचरण चुकं ओमबहाः वनेगु लँपु व झ्वःछेँ न्हूसाः जुयाः धर्मपथ वनेगु जीर्ण लँपु भिंकेगु धकाः थ्यंमथ्यं दछि न्ह्यः छगू कमिटी तकं नीस्वनाः स्थानिय बासिन्दातय्के नं ध्यबा म्हःगु खः । ध्यबा गुलि म्हय् धुंकल धइगु खँ सिबें नं लँ गबलय् पूवनी धइगु विशेष चिउताःया विषय जुयाच्वंगु दु ।

उगु हे लागाया न्हूसाः त्वालय् गबलें मवइगु व फय् जक वइगु लः नापं धःया मर्मत याकनं यायेत तकं इनाप यानाः तुल कापः तकं यखानाः लँ दयेकेगु सुचं सार्वजनिक याःगु खः । तर थौं वयाः उगु लँ दयेकेगु ला खँ त्वःताः हे छ्वये अप्पा चागः वा धाये लँ दयेकेत माःगु पूर्वाधार तकं तयार मजूनिबलय् उगु लागाय् यखाना तःगु तुल कापः नं झउ जुइक चना वने धुंकल ।

उगु लागाय् तसकं जिर्ण जुइक स्यनाच्वंगु लँ स्वयेबलय् नेपाःया यर्थाथता प्रतिविम्बित यानाच्वंगु लुइके फु । अथे हे लँ दयेकेत धकाः स्थानिय बासिन्दा तय्के काःगु ध्यबा अन वं थन वं मजुइक व हे स्यनाच्वंगु लँय् मोटर मोटरसाइकल ब्वाकीगु इलय् ब्वइगु धू नापं जक ब्वयावंगु खःला कि? कि गनं स्थानिय लगानी जक उठे जुयाः वडा कार्यालयं वा सम्बन्धित निकायं बी धाःगु बजेट जकं उपलब्ध मजूगु खः र?

सम्बन्धित पक्षं याकनं जानकारी बीगु नापं ज्या नं यानाः क्यना बिउसा दकलय् सर्हानीय ज्या थ्व हे जुइ ।

- लँजुवाः ।

More Stories Like this