छेँय् बम मुयाः स्वम्ह सित

पिने लूगु बम मस्तय्सं छेँय् हयाः म्हितूगु आशंका

येँ (सन्ध्या टाइम्स)/पूर्वी चितवनया भण्डाराय् थौं सुथय् स्थानीय मनूया छेँय् बम मुयाः छखा हे छेँखाया स्वम्ह जः सीगु दु। अथे हे मेपिं निम्ह गम्भीर रुपं घाःपाः जूगु दु।
उकी लानाः ४५ दँया जानुका राई, वया हे म्ह्याय् १८ दँया राममाया राई व छेँय् पाहां वयाच्वंम्ह मकवानपुर लोथरया राजकुमार राई सीगु खः। लिसें घटनाय् लानाः १० दँया अरविन्द राई व २१ दँया रामकुमार राई घाःपाः जूगु खःसा उमित आः भरतपुर अस्पतालय् वासः याकातःगु दु ।

घटना थौं सुथय् १०:३० बजे जूगु खः। घटना जूगु थाय् नारायणघाट बजारं ३० किलोमिटर मकवानपुरपाखे लाः। उगु बम भण्डारा वडा ८ या स्थानीय शुक्र राईया छेँय् मूगु खः।
स्थानीय मनूया छेँय् बम गय् यानाः मूगु धइगु खँ सी मदुनि। उकियात कयाः थीथी खँ पिहां वयाच्वंगु दु। गुलिस्यां लँय् लूगु बमयात न्ह्यवःसा धकाः मस्तय्सं छेँय् हयाः म्हिताच्वंबलय् विष्फोट जूगु खँ धाःगु दु। उगु बम सशस्त्र प्रहरीया गढीमाई गणं तालिमया झ्वलय् त्वःता थकूगु खँ धाःगु दु। तर मेगु छथ्वलं धाःसा शुक्र राईया छेँय् गाः म्हुयाच्वंगु इलय् उगु बम मूगु खँ धाःगु दु। प्रहरीं घटना बारे अनुसन्धान न्ह्याकेधुंकूगु दु ।