नेपाल संवत्यात भोट मबीपिं नेतातय् पहः
नेपाल संवत्यात राष्ट्रिय मान्यता बी हे माः धकाः आमसभा व भाषणय् ततःसलं हालीपिं राजनीतिक पार्टीतय्गु धाथेंया ख्वाःपाः आः नकतिनि संवैधानिक समितिइ बांलाक हे उलेगु ज्या जुल। न्हूगु संविधानया नां 'नेपाःया संविधान-११३०' तयेमाः धकाः नेपाः राष्ट्रिय पार्टीं तःगु प्रस्तावय् जूगु मतदानय् एमालेया छम्ह सभासद बाहेक मेपिं सुं हे पार्टीं भोट मबिउ। उमिसं विक्रम संवत् दुथ्याकाः हे संविधानया नां तयेमाः धइगु पक्षय् थःपिनि मत बिल। प्रस्तावया पक्षय् नेपाः राष्ट्रिय पार्टी व एमालेया छम्ह छम्ह यानाः मुक्कं निगू जक मत वःगु खः। संविधानसभाय् थ्व संवत्या पक्षय् छुं यायेगु इलय् हे यदि पार्टीतय्सं उकिया विपक्षय् मत बीगु खःसा थ्व संवत् नेपाःया राष्ट्रिय संवत् खः धकाः थुकिया पक्षय् भाषण याना जुइगु अधिकार नं राजनीतिक पार्टीतय्के मदु। लिसें नेपाल संवत्यात राष्ट्रिय मान्यता बीमाः धकाः आन्दोलन याना वयाच्वंपिं नेवाःतय्सं नं आः थ्व राजनीतिक पार्टीया नेतातय्त गनं सःताः सम्मान बिया च्वनेमाःगु आवश्यकता मंत। उकिया पलेसा उपिं गनं नं नापलात धाःसा नेपाल संवत्या सन्दर्भय् छाय् थज्याःगु 'डबल रोल' यानागु धकाः बरु न्ह्यसः तयाः लिसः फ्वनेमाःगु आवश्यकता दु। नेवाःतय् न्ह्यःने नेपाल संवत्यात राष्ट्रिय मान्यता बी हे माः, थुकिया बारे आयोग गठन याये, व याये थ्व याये धकाः भाषण मुइका वनीगु, अले राष्ट्रिय मान्यता बीकेगु थासय् चाहिं थुकिया विरोधय् मत बीपिं नेतात नेपाल संवत् आन्दोलनया बेइमान समर्थक खः। थुपिंपाखें होशियार जुइमाः। वास्तवय् नेपाःया नेतात थथे डबल स्टायण्डर्ड जुयाः हे नेपाःया थ्व हविगत जुयाच्वंगु खँ थन लुमंकेमाः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
