नेवाः स्वायत्त राज्य घोषणा

येँ (सन्ध्या टाइम्स)/नेवाःत थःपिं हे जानाः म्हिगः नेवाः स्वायत्त राज्य घोषणाया ज्या जुल। ताः ई तकया कुतः लिपा म्हिगः उगु ज्याझ्वः सफलतापूर्वक जूगु खः ।

नेवाः स्वायत्त राज्य मंकाः संघर्ष समितिया ग्वसालय् लाखौं नेवाःतय् दथुइ म्हिगः येँया दशरथ रंगशालाय् जूगु उगु नेवाः स्वायत्त राज्य घोषणा सभाय् नेपाःया आदिवासी जनजाति नेतात नापं थीथी राजीतिक दलया नेतातय्सं नेवाःतय्त भिंतुना बिसें नेवाः स्वायत्त राज्यया नितिं नापं जानाः संघर्ष यायेगु प्रतिवद्धता नं प्वंकल ।

उगु घोषणासभाय् न्ववासें आदिवासी जनजातितय्गु मंकाः संगठन नेपाल आदिवासी जनजाति महासंघया नायः पासाङ शेर्पां नेपाःया आदिवासी जनजातितय्गु आत्मनिर्णयया अधिकार नापं जातीय स्वायत्तता व स्वशासनयात संविधानय् ग्यारेन्टी मयात धाःसा सुंक च्वनेगु जुइ मखु धयादिल। वय्कलं न्हापा हे आदिवासी जनजातिया खँ दुमथ्याकूगु कारणं संविधानसभाया छगू समितिं तयार याःगु मस्यौदा संविधानसभाया न्ह्यःने हे च्याके धुन धयादिसें यदि संविधानय् आदिवासी जनजातिया मागयात संवोधन मयात धाःसा मस्यौदा जक मखु संविधानसभाया दुजःतय्त हे च्याके मालीगु ख्याच्वः नं बियादिल ।

अथे हे आदिवासी जनजाति सभासद् सभा (ककस)या नायः नापं नेपाली कांग्रेसया नेता इन्द्रबहादुर गुरुङं न्हापांनिसें हे ब्रम्हूतय्सं देय् संचालन यानाः देय्यात स्यंका वयाच्वंगु खः धासें आःया अवस्थाय् नं मूमू राजनीतिक पार्टीया झिंनिम्ह ब्रम्हू नेतातय्सं देय् स्यंकाच्वंगु दु धकाः द्वपं बियादिल।
सभाय् माओवादीया न्वकु नारायणकाजी श्रेष्ठ, एमालेया केन्द्रीय दुजः राजेन्द्र श्रेष्ठ, नेपाः राष्ट्रिय पार्टीया नायः डा. केशवमान शाक्य, नेपाली कांग्रेसया नेता नापं संघर्ष समितिया सल्लाहकार तिर्थराम डंगोल व नेपाली कांग्रेसया हे नेता नापं संघर्ष समितिया सल्लाहकार भिमसेनदास प्रधानपिंसं न्ववानादीगु खः ।
उगु घोषणा सभाय् नेवाः राष्ट्रिय म्ये हालेगु नापं नेवाःतय्गु मंकाः ध्वाँय् ब्वयेकेगु ज्या नं जूगु खः। उगु इलय् रंगशाला जायेक हे नेवाःतय्गु सहभागिता दुगु खः।