नेवाःत थःपिंसं हे याःगु नेवाः राज्य घोषणा

नेवाःतय्सं आः तक यानावःगु आन्दोलनय् गबलें मजूनि कथं म्हिगः येँया दशरथ रंगशालाय् टन्न मुनाः नेवाः स्वायत्त राज्य घोषणा यायेगु ज्या जुल। नेवाःतय्गु थःथःगु हे जातीय पुचः, भाषिक खलः पुचः, राजनीतिक पार्टीतय् जातीय कवः व मेपिं द्वलंद्वः स्वतन्त्र नेवाःत मुनाः याःगु थ्व घोषणासभा आः दयेकीगु न्हूगु संविधानय् नेवाः स्वायत्त राज्यया ग्यारेन्टी यायेमाः धकाः संविधान च्वयेत संविधानसभाय् मुनाच्वंपिंत बिउगु छगू स्पष्ट अभिमत खः। यदि संविधान जनताया अभिमत कयाः हे दयेकीगु खःसा नेवाःतय् सवालय् थ्व ति तःधंगु अभिमत शायद मेगु दइ मखु। फुक्क हे जाति, फुक्क हे पेशा, फुक्क हे क्षेत्र व फुक्क हे बिचाःया नेवाःत छगू हे दबुली मुनाः बिउगु थ्व अभिमतयात नं यदि संविधानसभा व अन प्रतिनिधित्व यानाच्वंगु राजनीतिक दलतय्सं वेवास्ता यात धाःसा आः गठन जुयाच्वंगु संविधानसभा नं छगू भ्रम जक खः धइगु खँ पुष्टि जुइगु ला द हे दु, उकिया नापनापं आः नेवाःतय्त नं थःगु अधिकार कायेगु खःसा ल्वाभः हे ज्वनाः कुहां वा धकाः याःगु छगू खुल्ला आह्वान नं जुइगु खँय् शंका मदु। देय्न्यंकं सशस्त्र युद्ध जुयाच्वंगु इलय् नं नेवाःतय्सं ल्वाभः मज्वं। बरु थज्याःगु हे ततःधंगु सभा व प्रदर्शन यानाः थःपिनि शिष्ट अभिव्यक्ति बीगु ज्या यानाच्वन। आः नं नेवाःतय्सं याःगु थ्वहे खः। देशय् धाथें शान्ति पलिस्था यायेगु खःसा थीथी समुदायं व्यक्त याइगु थज्याःगु शिष्ट अभिव्यक्तियात शिष्टपूर्वक ग्रहण यायेगु ज्या राज्य सत्तां यायेमाः। यदि शिष्ट दवावयात महसुस मयात धाःसा उकिं अन्ततः निमन्त्रण याइगु ला हिंसात्मक विध्वंशयात हे खः। नेवाःत व लँपुइ वनेमाःगु अवस्था मवयेमा ।

More Stories Like this