कन्हय् नेवाः राज्य घोषणा
नेवाः राष्ट्रिय म्येँ हालीगु, नेवाः ध्वाँय् ब्वयेकीगु
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिया ग्वसालय् कन्हय् येँया दशरथ रंगशालाय् जनस्तरं नेवाः स्वायत्त राज्य घोषणा यायेत्यंगु दु। नेवाः स्वायत्त राज्य मंकाः संघर्ष समितिं म्हिगः छगू पत्रकार सम्मेलन यासें थुकिया बारे जुयाच्वंगु तयारी बारे जानकारी बिउगु खः ।
थौं सुथंनिसें थाय्थासय् मुँज्या, सहलह, नेवाः ध्वाँय् तयेगु लगायत थीथी कथंया ज्याझ्वः यानाच्वंगु दु। सञ्चार माध्यमय् थुकिया प्रचार यायेत कन्हय् रंगशालाय् हे मिडिया सेन्टर तकं चायेकीगु खँ धाःगु दु। कन्हय् नेवाः देय् दबूया नेतृत्वय् नेवाः जातीय खलः पुचःया तःधंगु जुलुस येँया बसन्तपुरं, ज्यापु महागुथिं खुल्लामंचं, ज्यापु समाजं यलं नापं नेवाः राष्ट्रिय मुक्ति मोर्चां नं थीथी थासं जुलुस पिकाइगु ग्वसाः दु ।
अथे हे थीथी नेवाः खलः पुचः नापं मंकाः संघर्ष समितिइ दुथ्याःगु नेवाः देय्गुथि नेपालमण्डल, नेवाः जागरण मञ्च, लोकतान्त्रिक नेवाः दबू आदिपाखें बिस्कं बिस्कं थासं नापं थाय् थासय् च्वंपिं नेवाःतय्सं नं सांस्कृतिक बाजं थानाः जुलुस पिकासें रंगशालाय् मुनीगु ज्याझ्वः दु ।
कन्हय् रंगशालाय् जुइगु ज्याझ्वः
कन्हय् दशरथ रंगशालाय् न्हिनय् ११ बजे निसें नेवाः स्वायत्त राज्य घोषणासभा शुरु जुइ दु। नेवाः स्वायत्त राज्य मंकाः संघर्ष समितिइ दुथ्याःगु झिगू दुजः खलःया नायःपिंपाखें नेवाः स्वायत्त राज्य घोषणा यायेगु ज्याझ्वः तयातःगु दु।
नेवाः स्वायत्त राज्य मंकाः संघर्ष समितिया नायः नरेन्द्रभक्त हाडाया सभापतित्वय् उगु सभा न्ह्याइ। संघर्ष समितिया छ्यांज्ये नापं नेवाः देय् दबूया नायः नरेश ताम्रकारं लसकुस न्वचु बियादीसा ज्याझ्वः मंकाः संघर्ष समितिया दुजः नापं नेवाः देय् दबूया संरक्षक मल्ल के. सुन्दरं न्ह्याकादी। घोषणासभाय् मंकाः संघर्ष समितिइ दुथ्याःगु झिगुलिं हे खलःपुचःपाखें नेवाः ध्वाँय् ब्वयेकेगु, नेवाः स्वायत्त राज्य घोषणा यानादीसा कलाकारतय्सं नेवाः राष्ट्रिय म्येँ हालादी। ज्याझ्वलय् एनेकपा (माओवादी), नेपाली कांग्रेस, नेकपा (एमाले) व नेपाः राष्ट्रिय पार्टीया नायःयात संवोधन यानाः अतिथिया निंतिं पौ छ्वयेगु नापं सु नेता वल वयात हे न्ववाकेगु ज्याझ्वः दु ।
कन्हय् जुइगु नेवाः स्वायत्त राज्य घोषणा ज्याझ्वःयात एबीसी, सगरमाथा व एभेन्युज टिभी नापं उज्यालो, मेट्रो, इसीआर व मिर्मिरे एफएमं प्रत्यक्ष प्रशारण यायेत्यंगु दु ।
