नेवाः स्वायत्त राज्य घोषणाया अन्तिम तयारी

नेवाः स्वायत्त राज्य मंकाः संघर्ष समितिया आह्वनय् थ्वहे वइगु पोहेलाथ्वाः नवमि कुन्हु नेवाःतय् वस्तीइ नेवाःतय्सं हे नेवाः स्वायत्त राज्य घोषणा यायेगु ज्याझ्वःया व्यापक तयारी अन्तिम चरणय् थ्यंगु दु ।

पोहेलथ्वः नवमि शुनिवाः येँया दशरथ रंगशालाय् जुइगु ज्याझ्वःया बारे मंकाः संघर्ष समितिं बिहीवाः छगू पत्रकार सम्मेलन यानाः जानकारी ब्यूगु दु । क्षेत्रपाटी पार्टी प्यालेसय् जूगु पत्रकार सम्मेलनय् शनिवाः नेवाः स्वायत्त राज्यया ध्वाँय्, राष्ट्रिय म्येँ, राष्ट्रिय स्वयमसेवक दस्ता, जातीय भाषिक खलः पुचया स्वपू, राज्य संचालनया नीति व प्रस्ताव नं सार्वजनिक याइगु जानकारी ब्यूगु खः ।

संघर्ष समितिया अध्यक्ष नरेन्द्रभक्त हाडाया सभापतित्वय् जूगु पत्रकार सम्मेलनय् संघर्ष समितिया दुजः मल्ल के. सुन्दरं नेवाः स्वायत्त राज्यया सिमांकन नेवाःतय् बाहुल्य दुगु पूर्वया दूधकोशी निसें पश्चिमया त्रिशूली तक नेवाः स्वायत्त राज्य घोषणा याइगु कनादिल । अथेहे संघर्ष समितिया मेम्ह दुजः नापं माओवादी सभासद् दिलीप महर्जनं घोषण ज्याझ्वलय् ब्वति कायेत सकसितं इनाप यानादिल ।

थ्वहे दथुइ नेवाः स्वयात्त राज्य घोषणा सफल यायेत थीथी पेशाया नेवाःतय् दथुइ नं व्यापक रुपं सहलह याःगु दु । नापं ज्याझ्वलय् सक्रिय रुपं ब्वति कायेत नेवाः डाक्टर पुच:, इन्जिनियर पुचः, वकिल पुचः, व्यापारीक पुचः लगायत गठन याःगु दु ।

अथेहे घोषणा ज्याझ्व: ता: लाकेत थीथी संस्था व व्यत्तिगत रूपं ग्वाहालि कथं मूंकुगु २,५७,००० तका दां वाः स्वायत्त राज्य घोषणासभाया आर्थिक कजि वीरेन्द्रभक्त श्रेष्ठयात लःल्हानादीगु दु । ग्वाहालिकथं नेवाः जागरण मञ्चपाखें छगू लाख तका, मञ्चया सल्लाहकार रमेश महर्जनपाखे ५१ द्वः तका, मेम्ह सल्लाहकार मेघबहादुर श्रेष्ठपाखें २६ द्वः तका, क्षेत्रपाटी पार्टी प्यालेसपाखें १५ द्वः तका, मञ्चया दुजः कृष्णज्योति शाक्यपाखें १० द्वः, ईश्वर डंगोलपाखें ५ द्वः मुंगु खः। उगु हे ज्याझ्वलय् सुनचाँदी व्यवसायी संघया नायः तेजरत्न शाक्यपाखें सुनचाँदी व्यवसायी (स्वनिगः दुने) पाखें ५० द्वः तका ग्वाहालि या:गु खः ।

अथेहे नेवाःतय् मकां ध्वाँय् नेवाः लागाय् तयेगु ज्या व्यापक रुपं जुयाच्वंगु दु । नेवाःतय् छेँ, पसः, त्वाः, गाडी आदि थीथी थासय् नेवाः ध्वाँय् तःगु खः । संघर्ष समितिं झिद्वं ध्वाँय् पिथना थीथी थासय् तयेगु व इनेगु ज्या जुयाच्वंगु खँ धाःगु दु ।

नापं नेवाः स्वायत्त राज्य घोषणा यायेत थीथी नेवाः खल पुचःतय् दथुइ नं व्यापक सहलह जुयाच्वंगु दुसाः घोषणाया प्रचार यायेत येँया वंघ, न्यत, किपु लगायत थीथी थासय् र्‍याली व कोण सभा नं जुयाच्वंगु दु ।

(किपा: उदेन न्हूसाय्मि)

More Stories Like this