भारतलिसे प्रचण्डं याये धाःगु वार्ता गज्याःगु ?

एनेकपा (माओवादी) या अध्यक्ष व पुलांम्ह प्रधानमन्त्री पुष्पकमल दाहाल (प्रचण्डं) आः थम्हं वर्तमान सरकारया मालिक भारतलिसे हे थःपिंसं वार्ता यायेगु जुइ धकाः यानादीगु घोषणायात थनया माओवादी विरोधी राजनीतिक शक्ति व सञ्चार माध्यमतय्सं कडा रुपं टिप्पणी याना हःगु दु। प्रचण्डया थ्व धापूपाखें नेपाली राज्यसत्ताया धाथेंयापिं हकदार भारत हे खः धइगु स्वीकार यायेगु ज्या जूवनीगु बिचाः नं थ्व खेमां तयाहःगु दु ।

खतुं प्रधानसेनापति प्रकरणय् राष्ट्रपतिं ल्ह्वंगु पलाः व उकियात कयाः माओवादीं यानाच्वंगु विरोध नितान्त नेपाःया आन्तरिक मामिला खः। नेपाःया राष्ट्रपतिं राजीनामा मबिउ वा थुकिया बारे सदनय् खँ तकं तयेके मबिउ धकाः नेपालं भारतयात धाः वनेगु खँ मखु। माओवादीं ल्ह्वनाच्वंगु गुगुपत्ति माग भारत तयार मजूगु हे कारणं यानाः पूमवंगु खः, उकियात माओवादीं प्रमाण समेत बियाः पुष्टि यायेमाः। छुं जुयाः उगु माग भारतं यानाः हे पूमवंगु खः धइगु दसि माओवादीयाके दुसा उकियात कयाः भारतलिसे वार्ता यायेगु मखु, उकियात हे त्वहः दयेकाः भारत विरुद्ध खुल्ला जिहाद शुरु यायेमाःगु खः। तर अथे छुं मजुसे नेपाःया आन्तरिक मामिलायात कयाः तप्यंक भारतलिसे वार्ता यायेगु धकाः प्रचण्डं धयादीगुलिं वय्कःया धापू नेपाःया राजनीतिक ख्यलय् कडा आलोचनाया विषय जूगु दु ।

भारतलिसे वार्ता हे याये मजिउ धइगु मदु। वार्ता यायेमाःगु अनेक विषय ल्यं नं दनि। तर प्रचण्डं आः याये धाःगु वार्ता गज्याःगु खः? थ्व भचा अझ खुलस्त जुइमाःगु आवश्यकता दु। मखुसा थ्व छगू विदेशी हस्तक्षेपयात याःगु खुल्ला आह्वान खः धइगु हे पुष्टि जुइ ।

More Stories Like this