अन्ततः तोरणया बढुवा

अनमिनया म्याद मेगु खुला थपे याइगु जुल

येँ (सन्ध्या टाइम्स)/मानव अधिकार उल्लंघन प्रकरणय् लानाः विवादास्पद जुयाच्वंम्ह उपरथी तोरण जंगबहादुर सिंहयात अन्ततः सरकारं रथी पदय् बढुवा याःगु दु।
थौं च्वंगु मन्त्रिपरिषद् बैठकं सिंहयात बढुवा यायेगु निर्णय याःगु खः। थ्व बढुवाया नापं सिंह नेपाली सेनाय् प्रधानसेनापति छत्रमान गुरुङ्ग धुंकाःया 'सेकेण्डम्यान' जूगु दु। सेनाया भैरवनाथ गणय् ४९ म्ह बन्दी बेपत्ता याःगु प्रकरणय् लाःम्ह जूगुलिं वय्कःयात प्रधानसेनापतिया सेकेण्डम्यान दयेके मते धकाः अमेरिका व बेलायतं समेत नेपाल सरकारयात इनाप यानातःगु खः। रक्षा मन्त्री विद्या भण्डारीं वय्कःया बढुवाया निंतिं स्वला न्ह्यः हे मन्त्रिपरिषदय् प्रस्ताव यंकातःगु खःसां प्रधानमन्त्रीं उकियात पनातःगु खः। थ्वहे खँयात कयाः रक्षा मन्त्री भण्डारीं तःक्वः मछि बैठक बहिष्कार तकं याःगु खः ।

लिसें बैठकं नेपाली सेनायात लोकतान्त्रीकीकरण यायेगु निंतिं रक्षा मन्त्री विद्यादेवी भण्डारीया नेतृत्वय् छगू समिति नं स्वंगु दु। वइगु पुस ११ गते प्रधानमन्त्री माधव नेपाल चीन भ्रमणय् वनेत्यंगु दुसा बैठकय् उगु भ्रमणयात कयाः नं सहलह ब्याकूगु खः। लिसें बैठकं राष्ट्र संघीय मिसन अनमिनया म्याद मेगु खुला थपे यायेगु निर्णय नं याःगु दु।
बैठकं मिसाम्ह प्रहरी सुन्तली धामीयात मिजंपिं प्रहरीतय्सं बलात्कार याःगु घटना बारे छानवीन यायेगु, घाइते पत्रकार टीका बिष्टयात स्वंगू लाख तका ग्वाहालि बीगु निर्णय नं याःगु दु ।

नोवेलया लागिं कोइरालाया नां

पुलांम्ह प्रधानमन्त्री एवं नेपाली कांग्रेसया सभापति गिरिजाप्रसाद कोइरालायात नोवेल शान्ति पुरस्कारया निंतिं नां सिफारिस याना छ्वयेगु निर्णय सरकारं याःगु दु। थौं सुथय् च्वंगु मन्त्रिपरिषद् बैठकं थ्व निर्णय याःगु खः ।

प्रधानमन्त्री माधव नेपालं तयादीगु उगु प्रस्ताव सर्वसहमतिं अनुमोदन जूगु खँ उप प्रधानमन्त्री नापं विदेशमन्त्री सुजाता कोइरालां धयादीगु दु। पुलांम्ह प्रधानमन्त्री गिरिजाप्रसाद कोइरालाया म्ह्याय् सुजाता कोइराला उगु खँ अनुमोदन जुइ धुनेवं मन्त्रिपरिषद्या मुँज्या हे त्वःताः पिहां झाःगु खः ।

विश्वय् शान्तिया निंतिं ज्वः मदुगु योगदान यानाः महत्वपूर्ण भूमिका म्हितूपिंत स्वीडेनं थ्व सिरपाः बीगु खः। माओवादीं जनयुद्ध यानाच्वंगु इलय् नं शान्ति वार्ताया माध्यमं माओवादीयात संसदीय ब्यवस्थाय् हयाः देशय् शान्ति पलिस्था नापं संविधानसभाया चुनाव तकं यानाः तःधंगु योगदान याःगुलिं वय्कःयात उगु सिरपाःया हकदार तायेकूगु खः ।