थनिंनिसें संसद न्ह्याके बीगु
माओवादीया यकःति क्वःछिना
येँ (सन्ध्या टाइम्स)/एनेकपा (माओवादीं) यकःति कथं क्वःछिनाः थनिनिसें व्यवस्थापिका संसद सुचारु याके बीगु जूगु दु। वंगु साउनंनिसें संसद अवरुद्ध याना वयाच्वंगु माओवादीया थौं सुथय् च्वंगु संसदीय दलया मुँज्यां उगु कथं खँ क्वःछिउगु खः ।
माओवादी अध्यक्ष प्रचण्डं थौं थम्हं हे संविधानसभाया अध्यक्ष सुवासचन्द्र नेम्वाङ, नेपाली कांग्रेस संसदीय दलया नेता रामचन्द्र पौडेल, नेकपा (एमाले)या अध्यक्ष झलनाथ खनालयात थःपिंसं संसद सुचारु याके बीगु जुल धकाः जानकारी बियादीगु खः ।
नागरिक सर्वोच्चता, शान्ति, राष्ट्रिय स्वाधिनता, संयुक्त राष्ट्रिय सरकार व इलय् हे संविधान निर्माणयात एजेण्डा दयेकाः व्यवस्थापिका संसदय् नाराबाजी यासें संघर्ष याना वयाच्वंगु माओवादी आः संसद चायेके बीगु व संसद दुने हे च्वनाः थःपिंसं ल्ह्वना वयाच्वनागु एजेण्डायात कयाः खँ तयेगु धकाः थौं च्वंगु बैठकं निर्णय याःगु खँ माओवादीया छम्ह नेतां 'सन्ध्या टाइम्स'यात कनादिल। संसदया बैठक नं थौं हे सःतातःगु दु ।
आन्दोलनया स्वरुप हिलागु : प्रवक्ता
एनेकपा (माओवादी) या प्रवक्ता दिनानाथ शर्मां थनिंनिसें संसद चायेकेगु माओवादीया यकःति क्वःछिना धइगु संसदय् संघर्षया स्वरुप हिलागु खः धकाः 'सन्ध्या टाइम्स'यात कनादीगु दु ।
वय्कलं थौंया मुँज्यां आन्दोलनया झ्वलय् सरकारं याःगु दमनप्रति खेद प्रस्ताव पारित याःगु नापं सभासद् यशोदा सुवेदी लगायत यक्वसित हे घाःपाः याना बिउगु प्रति निन्दा यासें घाःपाः जूपिंत वासः यायेगु ब्यवस्थाया माग यायेगु खँ क्वःजिउगु दु धयादिल। थौं व्यवस्थापिका संसदया मुँज्या स्वताःत्या इलय् सःतातःगु दुसा मुँज्या न्ह्यायेवं हे माओवादी नायः प्रचण्डं न्ववानादीगु खँ नं प्रवक्ता शर्मां धयादीगु दु ।
माओवादीं भण्डाफोर याइगु
माओवादीया संयुक्त राष्ट्रिय जनआन्दोलन नेपालं प्यंगूगु चरणया आन्दोलन कथं पुस १० गतेनिसें राष्ट्रिय स्वाधिनताया निंतिं भण्डाफोर अभियान न्ह्याकीगु जूगु दु। देय्न्यंकं न्ह्याकीगु भण्डाफोर अभियान दथुइ नं समस्या समाधान मजुल धाःसा माग १० गते लिपा न्यागूगु चरणया संघर्ष कथं अनिश्चितकालया निंतिं बन्द यायेगु जुइ धकाः माओवादी अध्यक्ष प्रचण्डं म्हिगः न्हूबानेश्वरय् जूगु विरोधसभाय् धयादीगु खः ।
