निगमयात विमान वइगु जुल
छगः बालं काइगु छगः न्याना हइगु
ताःई न्ह्यवंनिसें विमान मदयाः घाटाय् वनाच्वंगु नेपाल वायुसेवा निगमया लागिं सरकारं निगः विमान कया बीगु जूगु दु । न्हापाया सरकारं निगमया विमान कायेगु लागिं थःपिं जमानी च्वने फइ मखु धयातःगु खःसा थुगुसी पर्यटन तथा नागरिक उड्डयन मन्त्री जुयादीम्ह हिसिला यिमं सरकारयात जमानी तयाः जूसा निगमयात विमान कया बीगु पहल याःगु खः ।
सम्बद्ध सूत्रतय्सं बिउगु जानकारी कथं सरकारं थ्वहे वइगुमाघया दुने बोइङ्ग - ७५७ छगः लिजय् हयेगु निर्णय यायेधुंकूगु दु । थ्व विमान वेट लिजय् हयेत्यंगु खः । पर्यटन सिजनयात ध्यानय् तयाः विमान नापं पाइलट पुचः समेत बालं कायेगु ल्याखं थ्व विमान हयेत्यंगु खः । विमान गनं कायेगु धकाः निर्णय मजूनि । उकिया लागिं आः याकनं हे टेण्डर आह्वान जुइगु खँ नं सूत्रं धाःगु दु ।
मन्त्रालय सूत्रया कथं थ्वयां खुलाया दुने निगमं छगः विमान हे न्यायेगु बारे नं सोच दयेकाच्वंगु खँ धाःगु दु । निगमं न्याइगु थ्व विमान बोइङ्ग वा एअरबस न्ह्यागु नं जुइफुगु खँ नं धाःगु दु ।
नेपाल वायुसेवा निगमपाखें न्ह्याबलें नं विमान न्याइबलय् कमिशनया खेल जुइगु जूगुलिं थुगुसी अज्याःगु छुं नं कासा मजुइमा धकाः सरकार तसकं सतर्क जुयाच्वंगु खँ सूत्रं धाःगु दु । थःत अज्याःगु विवादय् फँसे जुइ मयःगुलिं निगमपाखें छुं हे विवाद मवयेक ज्या यायेमाः धकाः मन्त्री यिमं कडा निर्देशन बियाच्वंगु खँ नं मन्त्रालय सूत्रं धाःगु दु ।
सरकारं सन् २०११ यात भिजिट नेपाल दँया रुपय् हनेगु तयारी यानाच्वंगु दु । उकिया लागिं पर्यटक सालेगु लागिं आवंनिसें हे तयारी यायेमाःगु खँ धाःगु दु ।
उखे नेपाली सेनां चीनयाके न्यायेगु धकाः तयारी यानाच्वंगु सैनिक विमान आः मन्याइगु जूगु दु । तर चीनयात उकिया अर्डर नापं वनेधुंकूगुलिं उगु विमानया पलेसा नेपालं हेलिकप्टर हजि धकाः इनाप याःगु दु । चीनं उगु हेलिकप्टर बीगु सहमति क्यनेधुंकूगु दु । सरकारं हेलिप्टर नागरिक उडानय् छ्यलेगु बिचाः यानाच्वंगु खँ धाःगु दु ।
