भारतीय सेनाया सुझावयात विरोध ग्व ?

भारतया च्यान्हु ताःहाकःगु भ्रमण यानाः लिहां वःम्ह प्रधानसेनापति छत्रमान गुरुंगयात भारतं नेपाली सेना दुने माओवादी सेना समायोजन याये मते धकाः 'सुझाव' बियाहःगु खँ सार्वजनिक जूगु दु। माओवादी सेना समायोजन यायेगु लागिं उमित समूहगत रुपं हे नेपाली सेनाय् दुकायेगु सहमति जूगु खः। उमित नेपाली सेनाय् दुकाये मखु धकाः पुलांम्ह प्रधानसेनापति रुक्मांगत कटवालं धाःगु खःसा आः न्हूम्ह प्रधानसेनापतियात नं भारतं अज्याःगु हे 'निर्देशन' बियाहःगु दु। नेपाःया प्रधानसेनापति भारतया नं मानार्थ प्रधानसेनापति खः। उकिं भारतीय सेनां धाःगु खँयात थ्व सेनां माने याइगु सम्भावना यक्व दु ।

तर सेना समायोजनया थ्व ज्या थय् यानाः या अथवा अय् यानाः या धकाः धया हयेगु नेपाःया आन्तरिक मामिलाय् हस्तक्षेप खः लाकि मखु? नेपालय् राष्ट्रिय सरकार गठन यायेमाः धकाः संयुक्त राष्ट्र संघं धाःबलय् नेपाः सरकारं थःपिनि आन्तरिक मामिलाय् हस्तक्षेप यात धकाः खुब बबाल याःगु खः। आः भारतीय सेनां आन्तरिक मामिलाय् याःगु हस्तक्षेपयात कयाः नेपाः सरकारं विरोध यायेमाःगु खः लाकि मखु ?

सेना समायोजन नेपालय् जुइगु शान्ति स्थापनाया दकलय् महत्वपूर्ण कडी खः। यदि सेना समायोजन मजुल धाःसा देशय् न्हूगु संविधान वःसां नं शान्ति स्थापना जुइ मखु। माओवादी सेनाया छगू ब्वयात नेपाली सेनाय् दुकायेगु सहमति कथं हे देशय् शान्ति प्रक्रिया न्ह्याःगु खः। उकिं माओवादी सेनायात नेपाली सेनाय् दुमकायेगु धाल धाःसा व तप्यंक हे देशय् शान्ति स्थापना मयाकेगु व न्हूगु संविधान तयार याके मबीगु हे षडयन्त्रया छगू अंग जुइ ।

More Stories Like this