छेँबुँइ जुयाच्वंगु लगानी क्वपालेगु निर्देशन

अनुत्पादक ख्यः धयातःगु छेँबुँ न्यायेगु ज्याय् बैंकया ध्यबा छ्यलेगु पलाः दिकेगु लागिं राष्ट्र बैंकं नकतिनि जारी याःगु निर्देशनं थ्व ख्यलय् तःधंगु हे हलचल हया बिउगु दु। छेँ दनाः च्वं वनेगु सिबें नं न्यानाः अथें वांछ्वया तयेगु व लिपा भाः थकयाः मीगु ताः तयाः बैंकयाके त्यासा कयाः व्यवसाय यानाच्वंपिंत थुकिं लिच्वः लाकीगु स्वाभाविक खः। आवंलि वाणिज्य बैंकतय्सं जग्गा न्यायेगु ज्याय् यानातःगु लगानी सीमित यायेमाल धकाः राष्ट्र बैंकया निर्देशन वयेसातकि जग्गाय् लगानी यानातःपिं बैंकतय्सं थःगु लगानी दुकाइगु स्वाभाविक खः। थुकिं यानाः अनावश्यक रुपं थहां वनाच्वंगु जग्गाया भाः कुहां वइगु अनुमान नं थन जुयाच्वंगु दु। वास्तवय् जग्गाया भाः थहां कुहां न्ह्यागु हे जूसां थ्व वहे ख्यलय् सक्रिय व्यवयासीतय्त सिबें मेपिं सर्वसाधारणयात सरोकार दुगु विषय धाःसा मखु। जग्गा कारोवार याइपिंसं कृत्रिम रुपं जग्गाया भाः थकयाः थुकियात मनूया अत्यावश्यक विषय सिबें नं व्यापारया विषय दयेका बिउगु दु। कृत्रिम व्यवसाय जूगु कारणं थ्व गुगुं नं इलय् क्वःदले फुगु यथार्थ खः। राष्ट्र बैंकं आः हे उकियात पनाः नेपाली अर्थतन्त्रयात भविष्यय् वये फुगु तःधंगु दुर्घटनापाखें बचे याना बिउगु दु धायेमाः ।

तर छेँबुँइ लगानी याये मदु धइगु नियम जक पिकायेवं बैंकतय् लगानी बचे जुइगु धाःसा मखु। थनं लिकया हःगु लगानी आः मेथाय् गन छ्वयेगु? थुकी नं सरकारं ध्यान तयेमाः। लगानी याये बहःगु उत्पादक ख्यः धइगु उद्योग, वाणिज्य खः। तर थौं देशय् थज्याःगु ख्यलय् लगानी यायेगु वातावरण मदु। सरकारया मेगु पलाः आः थ्व वातावरण दयेकेगुपाखे जुइमाः ।

More Stories Like this