'संसद बहिस्कार मखु स्वीकार'

माओवादीया संघर्षया रणनीति हिल

येँ (सन्ध्या टाइम्स)/एकीकृत नेकपा (माओवादीं) थःगु संसदीय संघर्षया रणनीति हीकाः न्हूगु कथं न्ह्याःवनेगु तयारी याःगु दु। न्हूगु रणनीति कथं आः व्यवस्थापिका संसदयात बहिस्कार मयासे सुचारु याके बीगु जूगु दु ।

वंगु साउनंनिसें नागरिक सर्वोच्चता, शान्ति, राष्ट्रिय स्वाधिनता, संयुक्त राष्ट्रिय सरकार व इलय् हे संविधान निर्माणयात एजेण्डा दयेकाः व्यवस्थापिका संसदयात बहिस्कार यानाः संघर्ष याना वयाच्वंगु माओवादीं आवंलि संसदयात चायेके बीगु व संसदय् हे च्वनाः थःपिंसं ल्ह्वना वयाच्वनागु एजेण्डायात कयाः खँ तयेगु रणनीति दयेकूगु दु धकाः माओवादीया छम्ह नेतां 'सन्ध्या टाइम्स'यात कंगु दु।
थःपिंसं ल्ह्वना वयाच्वनागु खँयात संसदय् न्ववानाः रेकर्ड याकेगु नापं थःपिंसं मेगु खँ मल्हायेगु धकाः संसदय् ल्वायेगु न्हूगु कथंया रणनीति दयेकूगु खः। माओवादीं सरकार बाय् कांग्रेस, एमाले सुं नाप नं सहमति यानाः संसद चायेके बीत्यंगु मखुसे थःपिंसं थुकथंया निर्णय यानागु खँ नं उम्ह नेतां धाःगु दु ।

थौं बन्द सिधल

माओवादीया संयुक्त राष्ट्रिय जनआन्दोलन नेपालं स्वन्हुया बन्दया झ्वलय् थौं लिपांगु न्हि कुन्हु न्हिनय् १२ बजे तक जक बन्द यानाः खुल्ला याःगु दु। थुगुसी आन्दोलनया झ्वलय् ल्वापुया केन्द्र जूगु संविधानसभाया भवन दुगु न्हू बानेश्वरय लागाय् छगू तःजिगु सभा यानाः थःपिनि ज्याझ्वः क्वचायेकेत्यंगु दु। सभाय् माओवादीया नायः प्रचण्ड, न्वकु डा. बाबुराम भट्टराईं न्ववानादीगु ज्याझ्वः दु। उगु सभाय् ब्वति कायेत न्हिनय् १२ बजेनिसें हे प्रदर्शनकारीत थःथःगु लागां वयेगु निंतिं थौंया बन्द चीहाकः याःगु खः। थुकथंया सभा देय्न्यंकं जुइगु खँ धाःगु दु ।

सतकय् संघर्ष न्ह्यानाच्वनी

एनेकपा (माओवादीं) संसदयात चायेका बिउसां सतकय् संघर्ष धाःसा न्ह्याकाच्वनीगु खँ धाःगु दु। आः जनतायात यक्व दुःख मजुइगु कथंया संघर्षया ज्याझ्वः बीगु तयारी यानाच्वंगु खँ सीदुगु दु। माओवादीं आः न्हूगु संघर्षया ज्याझ्वः स्थायी समितिया मुँज्या च्वनाः क्वःछीगु खँ नं धाःगु दु ।

आः घोषणा याइगु संघर्षया ज्याझ्वलय् पार्टीयात स्वयां नं दकलय् अप्वः जातीय मोर्चा, जनवर्गीय संगठन व थीथी कथंया मोर्चायात क्वकायेगु कथंया ज्याझ्वः हयेगुया लिसें माओवादीं घोषणा याःगु थीथी कथंया जातीय, क्षेत्रीय व भाषिक स्वायत्त गणराज्यया खँयात ध्वाथुइकेत जनताया छेँय् छेँय् वने कथंया आन्दोलन यायेगु धाःगु दु ।