लोडशेडिङं खत्तम यात

न्हिं न्हिं १२ घण्टा लोडशेडिङ यानाः नेपालय् गुलि तक भद्रगोल जुल धकाः ला सकस्यां खन हे जुइ । मत मदयाः मनूतय्गु जनजीवन ला अस्तव्यस्त हे जुयाच्वंगु दु । गन वने गन च्वने जुयाः व याये थ्व याये धइगु हे मदयाः हाहाकार हे जुयाच्वंगु खनेदु । सुथय् लः वःसा मत मदु । थौंकन्हय् पम्पुं मसायेकं लः वःगु मखु । मत मन्त कि ला लः तक हे काये खनीगु मखु । लँय् वंसा खिउँयाः ग्याना हे पुसे च्वं । सुनां हयेकाः जकं वइगु लाकि धकाः ग्यानाः ग्यानाः वनाच्वनेमाः । खिउँसे च्वन धकाः सरकारं प्रहरीया
सुरक्षा धाःसा बढे याःगु मखु । वहे गाडी यक्व चले जुइगु लँय् भचा पनाः हे चेक जाँच यानाच्वंगु दु । मेथाय् हुल जुइगु थासय् छुं नं जाँच मदु । प्रहरी नं मत मंत कि ग्याः थें च्वं । मत मदुथाय् पिहां हे वःगु खने मदु । खास यानाः मिसापिं मनूत आः पिने तक वनेत हे ग्यायेमाःगु जुयाच्वंगु दु । ग्यानाः आः छु पिहां तकं हे मवँसे च्वनाच्वनेगु ला कि छु छगू मजिउसा मेगु याये जिउगु ला सरकारं याना बीमाःगु खः नि । जनतायात छु जुल कि गज्याःगु समस्या जुइ धकाः सरकारया ध्यान तकं हे मवं थें च्वं ।

- जुनी वज्राचार्य, मरु ।

More Stories Like this