बन्दया निन्हु नं देय् ठप्प

सतक-सतकय् कार्यकर्ताया सांस्कृतिक ज्याझ्वः

येँ (सन्ध्या टाइम्स)/एकीकृत नेकपा (माओवादीं) नीस्वंगु संयुक्त राष्ट्रिय जनआन्दोलन नेपालं आह्वान याःगु स्वन्हुयंकंया आम हड्तालया निन्हु थौं नं स्वनिगः नापं देय् ठप्प जूगु दु। देय्न्यंकं यातायात, कलकारखाना, पसः, शिक्षण संस्था पूर्ण रुपं बन्द जुयाच्वंगु दु
।
आम हडताल आह्वान याःगु संयुक्त राष्ट्रिय जन आन्दोलन नेपालं एम्बुलेन्स, दमकल, पर्यटन, प्रेस, कुटनीतिक नियोगया गाडी नापं आकस्मिक यातायात धाःसा संचालन याके बियागु धाःगु दु। माओवादीं ल्ह्वनाच्वंगु नागरिक सर्वोच्चता, राष्ट्रिय स्वाधिनता, संयुक्त राष्ट्रिय सरकार दयेकेमाःगु नापं थीथी कथंया माग यासें थ्व बन्द याःगु खः। थ्व झ्वलय् प्रदर्शनकारी व प्रहरी दथुइ म्हिगः सनिलय् ल्वापु जूगु न्हू बानेश्वर लागाय् थौं सुथंनिसें हे प्रदर्शनकारीतय्सं सतकय् म्येँ हालाः, प्याखं हुलाः बन्द यानाच्वंगु दु। प्रदर्शनकारीतय्सं झापाय् थौं सुथय् छगः ट्रकय् मि तया बिउगु दु ।

सतकय् हे भुतू

स्वन्हुयंकंया आम हडतालया निंतिं थीथी थासं येँय् वयाच्वंपिं माओवादी कार्यकर्तातय्सं सतकय् हे मि च्याकाः जा थुयाः नयेगु व्यवस्था याःगु दु ।

आन्दोलनया झ्वलय् छेँय् छेँय् जा नः वनाच्वन धाःसा सतकय् प्रदर्शन याइपिं मदइ धकाः माओवादी कार्यकर्तातय्त छगू हे थासय् जा थुयाः नकेगु व्यवस्था याःगु खः। सतकय् च्वनाः जा नइपिं माओवादीतय्गु निंतिं कन्हय् तकया दुने भुतू सतक हे जुइ धकाः नं माओवादी नेतातय्सं धाःगु दु। बन्दय् म्हिगः बहनी तकं सतकय् गाडी चले याके मबिउगु खः ।