विफल जूवंगु कोपनहेगन सम्मेलन
तसकं उत्साहपूर्वक डेनमार्कया कोपनहेगनय् जूगु जलवायु परिवर्तन सम्बन्धी अन्तर्राष्ट्रिय सम्मेलन अन्ततः छुं हे उपलब्धी मजुइक क्वचाल। खतुं थ्व सम्मेलन शुरु जूगु इलय् हे थ्वपाखें छुं तःधंक उपलब्धी जुइ मखु धइगु अनुमान जुयाच्वंगु खः। अन्ततः सम्मेलनया समापनं वहे अनुमानयात सत्य साबित याना बिल ।
सम्मेलनपाखें कार्वन उत्सर्जनय् तःधंगु ल्हाः दुगु देतय्सं उत्सर्जन क्वपालेगु सवालय् छुं तःधंगु घोषणा याइगु आशा जूगु खः। तर उमिसं अज्याःगु घोषणा मयाः। बरु थःपिनिगु कार्बन उत्सर्जनया ज्यां गरीब देय्तय्त छुं लिच्वः लानाच्वंगु खःसा उकिया क्षतिपूर्ति पुलेत थःपिं तयार दु धकाः गरीब देय्तय्त फ्वगिंया व्यवहार यासें दां वांछ्वयेगु सहमति क्यन। यद्यपि धनी देय्तय्सं बी धकाः सहमति प्वंकूगु थ्व दां वइ हे धइगु छुं ग्यारेन्टी मदु। छुं जुयाः वहे वःसां नेपाःया ल्हातय् लाइगु सम्भावना ला झन् हे मदुनि। छाय्धाःसां कार्वन उत्सर्जनया सवालय् नेपाःया चिउताः व लबिंग उलि सशक्त जुइ मफुनि ।
कार्वन उत्सर्जन क्वपालेगु धायेसातकि विश्वय् आर्थिक प्रगति यानाच्वंगु चीन, भारत, ब्राजिल थेंज्याःगु न्हून्हूगु देय्तलिसे धेंधेंबल्लाः याये फइ मखु धकाः धनी देय्त ग्याः। उखे 'ब्रिक मुलुक - (ब्राजिल, रुस, इन्डिया व चीन) नं आः थःपिंसं आर्थिक प्रगति यायेगु पालय् पर्यावरणया मुद्दा ल्ह्वनाः थःपिंत पने दइ मखु धइगु अडानय् दु। थ्वहे द्वन्द्वं कोप-१५ यात ध्वस्त याना बिल। अथे खःसां जलवायु परिवर्तन बारे विश्वं थौं छु सोचे यानाच्वन धइगु सन्देश व सचेतना थनेगु ज्या धाःसा थ्व सम्मेलनं याःगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
