सुरु जुल थुगु दँया मिस नेवाः २००९

नेवाः समाजय् ब्वलंपिं थौंकन्हय्या पिढीपिन्सं थःगु भाषा, लिपि, कला, तजिलजि, संस्कार, परम्परा बुलुहुँ ल्वमंका च्वंगु अवस्थाय् दु । अथेजूगुलिं नेवाःतय्गु भाषा, लिपि, कला, तजिलजि, संस्कार, परम्परायात म्वाकातयेगु खःसा नेवाः समाजय् च्वंपिं नेवाः मय्जुपिन्त हे न्ह्यःने हयाः इमित थुकिया बारे ज्ञान बियाः सचेत यायेमा धैगु तायेकल । छाय् धाःसा मिस्त सचेत जुलधाःसा छेँया सकलें सचेत जुइ धैगु झीगु समाजय् ब्यास्त जुयाच्वंगु धापू खः । अथेजूगुलिं हे नेप्लीज फेशन होमं मिस नेवाः व मिस लिटिल नेवाः थें जाःगु ज्याझ्वःया ग्वसाःग्वल । थुगु ज्याझ्वःपाखें ग्वसाःखलकं नेवाः समाजय् च्वंपिं मय्जुपिन्त थःगु प्रतिभा न्ह्यब्वयेगु छगू दबूया नापं नेवाःतय्गु भाषा, लिपि, कला, तजिलजि, संस्कार, परम्परा थुइकाबिइगु बिचाः यात । थ्वहे बिचाःयात ज्याख्यलय् हल मिस नेवाः व मिस लिटिल नेवाः ज्याझ्वःया नामं वंगु न्यादँ न्ह्यः सन् २००५ सालं निसें । गुगु ज्याझ्वः थौं तक मदिक्क न्ह्यानाच्वंगु दु दच्छि छक्वः । थुकियाहे दसु खः थुगु दँय् न्ह्यानाच्वंगु मिस नेवाः २००९ ।

वंगु मंसिर ६ गते थुगु दँया मिस नेवाः २००९ ज्याझ्वःया निंतिं मल्ल होटलय् ल्यज्या जुल । गुगु ल्यज्यां स्वीखुम्ह नेवाः समाजया झिंखुदँ निसें नीनिदँ तकया मयजुपिन्त ल्ययेगु ज्या जुल । वयां लिपा मंसिर १५ गते निसें इमिगु निंतिं प्रशिक्षण ज्याझ्वः मल्ल होटलय् न्ह्यात । प्रशिक्षण ज्याझ्वलय् नेवाःतय्गु भाषा लिपि, कला, तजिलजि, संस्कार, परम्परा व नेवाःत नाप स्वापू दुगु खँ व ज्याझ्वःया निंतिं आवश्यक मेमेगु खँ स्यनेगु ज्या प्रशिक्षक राजु नापित पाखें जुयाच्वंगु दु । अथेहे रोजिन शाक्यं इमित दबली गुकथं क्वकाय्गु धकाः स्यनाः कोरियोग्राफि यानाच्वनादीगु दुसा डान्स कोरियोग्राफर रोहिया महर्जनं इपिं मय्जुपिन्त हुलाप्याखँ स्यनाच्वनादीगु दु । थ्वहे ज्याझ्वःया दथुइ स्वीखुम्ह मय्जुपिनिगु फोटोसेसन मनकामना चाःहिलेगु ज्याझ्वः, वसः सुइगु ज्याझ्वः, समाः यायेगु ज्याझ्वः नापं थीथी बिषयसं प्रशिक्षण तकं न्ह्यानाच्वंगु दु । आः वइगु पौष १० गते शुक्रवाः हिमालय होटलय् इमिगु प्रतिभा क्यनेगु निंतिं ट्यालेन्ट सो जुइत्यंगु दु । थुगु ज्याझ्वः पाखें उत्कृष्ट प्रतिभा न्ह्यब्वःम्हेसित मिस ट्यालेन्टया ताजं छाय्पिइ ।
वयां लिपा पौष ११ गते सनिवाः फाइनल कासाया निंतिं सु गुलि त तयार जुल धैगु सीकेत प्रिजजमेण्ट ज्याझ्वः जुइ । गुकिइ निर्णायकतय्सं ब्वति काःपिं मय्जुपिन्त इमिगु प्रशिक्षणया अवधि ब्यूगु शिक्षा नापं इमिगु अनुशासन भाषा आत्मविश्वास नापंया खँ स्वयेगु ज्या जुइ ।

दकले न्ह्याइपुइगु व परिक्षाया लिच्वः वइगु दिं खः पौष १५ । पौष १५ गते बुधवाः नेपाल प्रज्ञा प्रतिष्ठानया हलय् जुइ मिस नेवाः २००९या फाइनल कासा । गुकिइ मुक्कं झिंप्यंगू टाइटलया निंतिं स्वीखुम्ह नेवाः मय्जुपिन्सं धेंधेंबल्ला याइ । मिस नेवाः फष्ट रनरअप, सेकेण्ड रनरअप व मिस ट्यालेन्ट यानाः मुक्कं प्यम्हेसित वहःया ताज व झिम्हेसित सवटाइटल ।

आः सुना सुना त्याकीले थुगु दँया मिस नेवाः २००९ या ताज अथे थीथी सवटाइटल व धाःसा स्वय् ल्यं हे दनि ।

More Stories Like this