आम हडताल शान्तिपूर्ण
छगू दर्जन गाडी तोडफोड, छगू दर्जनं मल्याक मनू ज्वन
येँ (सन्ध्या टाइम्स)/एकीकृत नेकपा (माओवादीं) नीस्वंगु संयक्त राष्ट्रिय जनआन्दोलन नेपालं आह्वान याःगु स्वन्हुयंकंया आम हड्तालया न्हापांगु न्हिइ थौं शान्तिपूर्ण हे जूगु खने दतसा छुं छुं थासय् धाःसा प्रदर्शनकारीतय्सं बन्द अवज्ञायात धकाः गाडी तोडफोड याना बिउगु दु। बन्द आह्वानं यानाः थौं सुथंनिसें देय्न्यंकंया जनजीवन प्रभावित जूगु दु।
एनेकपा (माओवादीं) ल्ह्वनाच्वंगु नागरिक सर्वोच्चता, राष्ट्रिय स्वाधिनता, संयुक्त राष्ट्रिय सरकार दयेकेमाःगु नापं थीथी कथंया माग याना आह्वान याःगु आम हड्तालया झ्वलय् प्रदर्शनकारीतय्सं वानेश्वरय् बा. १ ज १४५९ नम्बरया ट्याक्सी, पोखराया महेन्द्रपुल लागाय् ग. १ प २२९७ नम्बरया निजी कार, बाँकेया विपि चोकय् छगः गाडी व स्याङ्जाया पुतलिबजारय् छगः बस तोडफोड याःगु दु ।
बन्द आह्वान यानाः प्रदर्शन यानाच्वंपिं माओवादीया स्वम्ह कार्यकर्तातय्त येँया गौशाला लागां ज्वना यंकूगु दु। प्रकार अधिकारी, शेखनाथ आचार्य व नर बहादुर तामाङयात ज्वनाः महाराजगंजय् कुनातःगु दु। उगु हे कथं राजविराजय् नं प्रहरीं न्याम्हं मल्याक प्रदर्शनकारीतय्त ज्वना यंकूगु दु। थाय्थासं जुलुस नं पिहां वयाच्वंगु दु ।
मन्त्रीपाखें बन्द अवज्ञा
माओवादीपाखें आम हडताल आह्वान यानाः विरोध प्रदर्शन याना च्वंगु हे इलय् थौं सुथय् मन्त्रीतय्सं बन्दया अबज्ञा यानाः सिंहदरवारय् दुहां वंगु दु ।
प्रदर्शनकारीतय्सं पना च्वंक च्वंक हे सुथय् ९ बजे न्ह्यः प्रहरीया बल प्रयोग यानाः उगु कथं मन्त्रीत पुतलि सडक जुयाः सिंहदरवारय् दुहां वंगु खः। न्ह्यःने लिउने प्रहरीया गाडी तयाः मन्त्रीत गाडीइ च्वनाः सिंहदरवारय् वंगु इलय् पद्मोदय मोड लागाय् प्रदर्शन यानाच्वंपिं माओवादीया कार्यकर्ता व प्रहरीया दथुइ भच्चा घ्वातुघ्वानाः सनेगु नापं छगू कथं तनाव ब्वलंगु खः ।
