नेवाः राज्य घोषणा सकल नेवाःतय् दायित्व

थ्वहे वइगु शनिवाः नेवाःतय्सं यायेत्यंगु नेवाः स्वायत्त राज्य घोषणा ज्याझ्वःयात ताःलाकेगु लागिं जुयाच्वंगु गतिविधिं तीव्रता काःगु दु। वंगु विहीवाः निसें ग्वसाः खलः नेवाः स्वायत्त राज्य मंकाः संघर्ष समितिपाखें नेवाः राज्य दुनेया नेवाःतय् छेँय् छेँय् नेवाः ध्वाँय् ब्वयेके बीगु लागिं त्वाःत्वालय् वनाः ध्वाँय् इनेगु व घोषणा कुन्हु हायेकीगु नेवाः राष्ट्रिय गान नं सार्वजनिक यायेगु ज्या शुरु याःगु दु। नेवाःतय्सं थःपिनि आन्दोलनयात थुलि नी यानाः पित हःगु सम्भवतः थ्वहे न्हापांखुसी जुइमाः। न्ह्याबलें नं राज्ययाके व माल थ्व माल धकाः फ्वनेगु आन्दोलन याना वयाच्वंपिं नेवाःतय्सं थुपालय् थःपिंसं हे राज्यसत्ता दयेकेगु तहया आन्दोलन न्ह्याकूगु दु। थ्व ल्याखं धायेगु खःसा नेवाः आन्दोलनया थ्व दकलय् उत्कर्ष रुप खः ।

छुं न्हि न्ह्यः जक एनेकपा (माओवादीं) नं येँय् छगू ज्याझ्वः यासें नेवाः स्वायत्त गणराज्य घोषणा याःगु खः। नेवाःतय्सं थुकियात अन्यथा कायेमाःगु आवश्यकता मदु। थज्याःगु हे घोषणा यदि मेमेगु पार्टीतय्सं नं याना बिल धाःसा आः दयेकीगु संविधानय् नेवाः स्वायत्त राज्यया नक्सा नं कीगु खँय् झी ढुक्क हे जूसां जीगु खः। तर माओवादी बाहेक मेगु पार्टीतय्सं थ्व ज्या यानाच्वंगु मदु। उकिं राजनीतिक पार्टीतय्त व मुलतः संविधानसभायात दवाव बीगु ल्याखं नं नेवाःतय्सं आः यायेत्यंगु नेवाः स्वायत्त राज्य घोषणाया बिस्कं महत्व दु। छुं जुयाः कन्हय् संघीय व्यवस्था मबीगु षडयन्त्र जुल धाःसा नेवाःतय्सं समानान्तर सरकार दयेकेगु तकया पलाः ज्वने मालेफु। उकिं थ्व ज्याझ्वःयात सफल यायेत सम्पूर्ण नेवाः जायेमाःगु अतिकं आवश्यक दु ।

More Stories Like this