नेवाः भासं आखः ब्वनाः नर्स

सुनिता मानन्धर

ने.सं. ११२४ य् मांभाय्या माध्यमं आखः ब्वंकीगु जगत सुन्दर ब्वनेकुथिइ न्हय्गू तगिं क्वचायेकादीपिं मध्ये विद्या खड्गी नं छम्ह खः। वय्कलं नर्सरींनिसें न्ह्यगू तगिं तक नेपालभाषाया माध्यमं हे आखः ब्वनादिल। अबलय् ब्वनेकुथि नि.मा.बि तक जक न्ह्यानाच्वंगु खः। न्ह्यगू लिपा वय्कः सरस्वती निकेतन मा.बि.इ भर्ना जुयादिल। जगत सुन्दर ब्वनेकुथिइ दक्व विषय अंग्रेजी व नेपालभाषां ब्वनाच्वंगुलिं खस भाय्या माध्यमं ब्वनेत वय्कःयात भचा थाकुल। वय्कलं धयादी, 'दच्छि तक ला विज्ञान, सामाजिक, गणित विषयया खँग्वः थुइके तसकं थाकुल।' यद्यपि वय्कःया अंग्रेजी धाःसा तसकं बांलाः ।

न्हापांगु श्रेणीइ एसएलसी पास जुइवं वय्कलं नर्सिङ्ग प्रिपरेसनया क्लास कयादिल। दकलय् न्हापां ललितपुर नर्सिङ्ग क्याम्पसय् इन्ट्रान्स जाँच बियादिल। उगु ईयात वय्कलं थुकथं लुमंकादी, 'अबलय्या ई जिगु लागि छगू चुनौतिया ई खः। नेपालभाषाया माध्यमं आखः ब्वंसां जि नं सुं स्वयां कम मजू धकाः सकसियां न्ह्यःने क्यनेमाःगु ई खः। उकिं जिं फक्व कुतः याना। लिपा इन्ट्रान्सया लिच्वः कथं जिगु फोटोनापं पत्रिकाय् नां पिहां वल। जि जक मखु जिमि त्वाःयापिं नापं सकलें अजू चाल।' वय्कलं ८३ प्रतिशत हयाः थःगु नां पिकयादीगु खः ।

वय्कलं नर्सिङ्गया लिच्वः नं बांलाक हे हयादिल। दकलय् न्हापां वय्कलं लाइफ केयर हस्पिटलय् प्यला ज्या यानादिलसा थौंकन्हय् मोडल अस्पतालय् नं नर्स जुयाः ज्या याना च्वनादीगु दु। धयादी, 'नेवाः भासं आखः ब्वनकि मेगु भाय् थुइके थाकुइ धयागु छगू भ्रम जक खः। जिं न्हय्गू तगिं तक नेपालभाषा व अंग्रेजी माध्यमं आखः ब्वना। च्यागू निसें झिगू तक खस भाय्या माध्यमं आखः ब्वना। अनं लिपाया माध्यम अंग्रेजी भाय् जूवन। उकिं ब्वनेगु सयेकेगु माध्यम धयागु मचाबलय् थम्हं सःगु थूगु भाषा जुल धाःसा अःपुक हे थःगु लक्ष्यय् थ्यंके फइ ।'

लुमंकेबहःजू थुगु ब्वनेकुथिइ आखः ब्वनाः दकलय् न्हापां नर्स जुयादीम्ह मन्जु चित्रकार थौंकन्हय् थःगु अध्ययनया झ्वलय् लण्डन झाये धुंकल। अथे हे मेपिं नं तःम्हमछि हे थौंकन्हय् नर्स ज्या यानाच्वनादीगु दु ।

अथे ला नर्स जक मखु थुगु ब्वनेकुथिया ब्वँमिपिं इन्जिनीयर व मेमेगु पेशाय् नं कार्यरत जुयाच्वंगु दु ।

More Stories Like this