नियात्रा बचतया थीथी ज्याझ्वः

नियात्रा बचत तथा ऋण सहकारी संस्था लि.पाखें ध्यान शिविर नापं थीथी कथंया ज्याझ्वःत यानाः मानवीय जीवनया मूल्य मान्यता ध्वाथुइकेगु नापं देय्या थीथी थासय् भ्रमण यंकाः ध्यान शिविरत याकेगु ज्या न्ह्याकाच्वंगु दु। वंगु आश्विन महिनाया २ गते जक येँया तेबहालय् नीस्वंगु उगु संस्थां म्हो इलय् नं थीथी कथंया आर्थिक प्रगति नापं समाजसेवाया लागाय् समेत ल्हाः तया हःगु दु। ललित मण्डप टुर्स एण्ड ट्राभल्सपाखें ५० प्रतिशत व नियात्रा ध्यान समुहया ५० प्रतिशत दां फ्यानाः उगु बचत संस्था वंगु असोज २ गते नीस्वंगु खः। थौंकन्हय् उगु संस्थाय् ७४ म्ह शेयर होल्डरत दु। मंसीरया लिपांगु वाः तकया दुने ९६ लाख ५० हजार दां शेयर पुँजी थ्यनेधुंकूगु दु। डिपोजिट धाःसा १ करोड ३६ लाख थ्यनेधुंकूगु दु ।

थथे नियात्रा बचत तथा ऋण सहकारी संस्थापाखें मुक्कं बचत यायेगु व त्यासा बीगु जक ज्या मयासे थः दुजःतय्त थीथी कथंया तालिम व क्रियाकलापय् दुथ्याकेगु ज्या नं ब्यापक रुपं हे न्ह्यानाच्वंगु दु। थ्व हे थुगु बचत संस्थाया विशेषता धाःसां जिउ। आः नकतिनि हे लत्या तकया प्रभावकारी उद्घोषण तालिम नं क्वचाल। हाकनं थुगु संस्थां आधारभूत स्वास्थ्य सम्बन्धी तालिम न्ह्याकेत्यंगु दु। विपश्यना ध्यान नापं थीथी कथंया ध्यान शिविर चले यायां हे ललितमण्डप वेयर फेयरपाखें नेतृत्व यानाः शुरु याःगु थुगु बचत संस्थापाखें थ्वहे वइगु माघ २ गतेनिसें थःगु हे बचत संस्थाया भवनय् वाः पतिकं ध्यान शिविर न्ह्याकेगु नं योजना हयेधुंकूगु दु। नापं आकिवं चीन, श्रीलंका, मलेशिया व बैंककया च्याङमाइलय् भ्रमण याकेगु निंतिं आवंनिसें हे दां डिपोजिट याकेगु शुरु यायेधुंकूगु दु ।

थुगु संस्थाया स्थापना हे थीथी कथंया यात्रा नियात्रापाखें शुरु जूगु खः। यात्रा याये चाहे जूपिंसं थीथी कथं लय् निश्चित दां मुंकेगु ज्या जुइवं थुगु नियात्रा बचत संस्थाया नं परिकल्पना जूगु खः। न्हापा यलया उग्रचण्डी बचतय् ज्या यानादीम्ह गौतमरत्न तुलाधरं हे उगु संस्थाया अध्यक्षया भूमिका म्हितादीगु दु। बैंकक यंकेगु निंतिं म्हतिं न्यय्द्वः तका फुइगु जुयाः लय् न्याद्वःया ल्याखं दां मुकाच्वंगु दुसा मेगु राष्ट्रय् भ्रमण वनेगु निंतिं अथे हे छगू लख ति फुइगु जुयाः लय् झिद्वः तका मुंकेगु ज्या जुयाच्वंगु दु। बैंकक थ्यंकाः अन्तर्राष्ट्रिय ध्यान केन्द्रय् हे विपश्यना ध्यान याकीगु कथं थुगु नियात्रा ज्याझ्वः क्वःछिनातःगु खः। न्हय्न्हुया टूर खःसा उगु यात्रा धाःसा झिंन्यान्हु तक जुइगु खँ गौतमरत्न तुलाधरं कनादिल ।

ललितमण्डप वेल फेयर सोसाइटीपाखें यानाच्वंगु थीथी ज्याझ्वःयात घ्वासा बीकथं थुगु बचत संस्था नीस्वनाः थीथी ज्याझ्वःत न्ह्यानाच्वंगु दु। थःपिनि संस्थाय् थाय् मगाइगु इलय् हारती क्लबय् नं उकथंया विपश्यना शिविर यायेगु यानाच्वंगु दु। अथे थीथी गतिविधि यायेगु हे झ्वलय् थ्वहे वइगु पुस १५ गते बर्दिया राष्ट्रिय निकुञ्ज लिक्क दयेकेत्यंगु छगू चीभाः उलेज्याय् नियात्रा पुचः थ्यंकेत्यंगु दुसा नेवाः मोडर्न स्कूल दरवार मार्गनापं जानाः सांस्कृतिक ज्याझ्वः नं यायेत्यंगु दु। अथे हे आः याकनं हे थुगु संस्थाया पहलय् नियात्रा बीमा ट्रेडिङ लिमिटेड नांगु छगू कम्पनी हे दर्ता यायेत्यंगु दु। उकिया लागिं ब्यापक रुपं प्रक्रिया हे शुरु जुइधंुकूगु खँ नियात्रा बचतया अध्यक्ष गौतमरत्न तुलाधरं 'सन्ध्या टाइम्स'यात कनादिल ।

More Stories Like this