नेवाःतय् छँय् छेँय् नेवाः ध्वाँय्
नेवाः राज्य घोषणाया प्रचार अभियान न्ह्यात
येँ (सन्ध्या टाइम्स)/वइगु पुस ११ गते जुइगु नेवाः स्वायत्त राज्य घोषणा ज्याझ्वःया प्रचार यायेगु झ्वलय् म्हिगः निसें नेवाः राष्ट्रिय ध्वाँय् इनेगु ज्या शुरु यात। नेवाः स्वायत्त राज्य मंकाः संघर्ष समितिपाखें येँया दशरथ रंगशालाय् नेवाः स्वायत्त राज्य घोषणा याइगु ज्याझ्वः दु। थुकिया प्रचार यायेत म्हिगः निसें नेवाः ध्वाँय् व नेवाः राष्ट्रिय म्येँ इनेगु अभियान न्ह्याकूगु दु ।
मंकाः संघर्ष समितिया दुजःपिं नापं नेवाः ख्यःया न्ह्यलुवातय्सं म्हिगः सनिलय् असनंनिसें उगु अभियान न्ह्याकूगु खः। अभियानया झ्वलय् छेँखापतिकं न्यय्तका दां कयाः नेवाः ध्वाँय् तयेकेगु ज्या याःगु खः ।
नापं नेवाः राष्ट्रिय म्येँ हाले सयेकेगु निंतिं नं न्यंकनं म्येँ थ्यंकेगु जुइ धकाः मंकाः संघर्ष समितिं धाःगु दु। नेवाः राष्ट्रिय म्येँ जनकवि दुर्गालाल श्रेष्ठं च्वयादीगु खःसा उकी तिर्थ मालीं संगीत तयादीगु खः ।
अष्टमातृका चाःहिलीगु
पुस ११ गते नेवाः स्वायत्त राज्य घोषणा जुइ कुन्हु ज्यापु महागुथिपाखें येँदेय् निर्माण जुयाच्वंगु खड्गाकारया च्याकू कुनय् च्वंपिं अष्टमातृका लागा चाःहिलेगु रुट दयेकूगु दु। थीथी लागां र्याली पिकयाः लँय् लाःगु अजिमा लागा चाःहिलाः खुला मञ्चय् मुनीगु व अनं तःधंगु र्याली सहित रंगशाला वनीगु ज्याझ्वः दु ।
