प्रहरी पाः तयाः पुजारी प्रवेश
थिनंनिसें पशुपतिइ नेपाली पुजारी
स्थानीय जनताया विरोधया वावजूद नं थौं पशुपतिइ ब्रम्हू जातियाम्ह मूल पुजारीयात द्यःयाथाय् प्रवेश याकेगु कुतः जुयाच्वंगु दु । सरकारं नकतिनि नियुक्त याःपिं मूल पुजारी व पुजारीयात थौं सुथय् हे पशुपित प्रवेश याकेगु धाःसां न्हिनय् तकं थ्व प्रवेशया ज्या धाःसा मजूनि । अन प्रवेश याके न्ह्यः पुजारीतय्त पशुपति लागाया थीथी द्यः पुजा याकेमाःगु चलन दु ।
उखे मूल पुजारी नियुक्तिया विरोध यानाच्वंपिं भण्डारीतय् धर्नाधाःसा थौं नं जारी दनि । उमिसं पशुपतिया मूल पुजारी राजोपाध्याय तयेमाः धइगु माग यासें थ्व धर्ना बिया वयाच्वंगु खः । सरकारं थःपिं लिसे सल्लाह तकं मयासे पशुपति व ग्वल देय्या संस्कृतिलिसे छुं हे सरोकार मदुपिं मनूतय्त पुजारी नियुक्त यात धासें विरोधय् पर्चा नापं पिकयाः इनाच्वंगु दु ।
थौंया ज्याझ्वःपाखें असन्तुष्ट जुयाच्वंपिं मेपिं मनूत नं अन थ्वःचा थ्वःचा मुनाः खँ ल्हानाच्वंगु दु । अथे खँ ल्हानाच्वंपिं गुलिखे मनूतय्सं धाःसा न्हूम्ह पुजारी नियुक्तिया ज्याय् जुजुयाप्रतिक हयेमाःगु राय नं बियाच्वंगु दु । गुलिसिनं धाःसा भारतीय भट्टयात चीकाः नेपालीयात पुजारी नियुक्ति याःगु बांलाःगु ज्या खः धकाः प्रशंसा नं यानाच्वंगु दु ।
जुयाच्वंगुलिं थौं पशुपति प्रवेश याकीबलय् पंगः वयेफु धकाः पशुपित लागाय् प्रहरी नं पाः तयातःगु दु ।
तर न्हिनय् तक अज्याःगु छुं गडबडीया जानकारी धाःसा मवःनि । थ्व विवादयात कयाः म्हिगः सर्वोच्च अदालतय् छगू रिट नं दर्ता जुइधुंकूगु दु । रिटय् सरकारं यायेत्यंगु थ्व ज्यायातरोके यायेत परमादेश जारी यायेमाः धकाः माग यानातःगु दु ।
थ्वहे झ्वलय् मेखे लोकतान्त्रिक नेवाः संघ येँ जिल्लाया नायः जलद वैद्यं थन छगू वक्तव्य पिकासें नेवाः ब्रम्हू नियुक्त यायेमाःगु परम्परायात त्वाःथलाः खँय् ब्रम्हूयात पुजारी नियुक्त याःगुलिं थुकिं उगु लागाया नेवाः संस्कृति नापं प्रभावित जूवनीगु खँ धाःगु दु । एमाले येँ मनपा ८ वडा कमिटीपाखें नं छगू वक्तव्य पिकासें सरकारं याःगु थ्व यकःति निर्णयया विरोध यानाः राजोपाध्याय हे नियुक्त यायेत माग याःगु दु ।
