लुम्बिनीइ झिक्वःगु बौद्ध सम्मेलन

ऐतिहासिक लुम्बिनीइ झिक्वःगु राष्ट्रिय बौद्ध सम्मेलन म्हिगः शुरु जुल। धर्मोदय सभाया ग्वसालय् थज्याःगु सम्मेलन थ्व स्वयां न्ह्यः गुक्वः तक देय्या थीथी थासय् जुइधुंकूगु दु। थुगुसी बुद्ध जन्म जूगु थाय् लुम्बिनीया गौरव बारे प्रचार यायेगु ताः तयाः झिक्वःगु सम्मेलन लुम्बिनीइ जुयाच्वंगु खः। लुम्बिनीया गरिमा बारे प्रचार यायेगु ताः तयाः थुगुसी लुम्बिनीइ थ्व सम्मेलन याःगु अतिकं सान्दर्भिक जू। छाय्धाःसां छगू ला लुम्बिनी विश्व सम्पदा खः। मेगु, शान्तिया सन्देश विश्वय् प्रवाह याःम्ह बुद्धया जन्मस्थल जूगु कारणं लुम्बिनीयात संयुक्त राष्ट्र संघं हे शान्तिया उद्गमस्थल कथं प्रवर्द्धन यायेगु ग्वसाः दयेकूगु दु। उकिया निंतिं राष्ट्र संघं छगू बिस्कं समिति तकं गठन यानातःगु दु। उखे संयोगवश थौंकन्हय् नेपालय् संयुक्त राष्ट्र संघया मिशन अनमिन नं वयाच्वंगु दु। खतुं अनमिनया ज्या मेगु हे खः। अथे खःसां लुम्बिनीया महत्व व संयुक्त राष्ट्र संघलिसे थुकिया स्वापू बारे बांलाक प्रचार याये फत धाःसा हानं छक्वः विश्वया ध्यान थुखेपाखे सालाः लुम्बिनीयात ब्रम्हाण्डया हे पवित्र शान्तिया उद्गमस्थल कथं विकास यायेगु अवसरयात जीवित याये फइगु सम्भावना दु। लुम्बिनी प्रति विश्वया हे आस्था दुगु कारणं थुकिया विकासं नेपाःयात लबः दइगु ला द हे दु, लिसें विश्वं हे आध्यात्मिक लबः काये फइगु निश्चित दु ।

न्ह्यःने वयाच्वंगु राष्ट्रिय जनगणनाय् बौद्धतय्त सचेत यायेगु अभियान न्ह्याकेगु सम्मेलनया मेगु लक्ष्य नं उतिकं सान्दर्भिक जू। पंचायतकालय् छलछाम यानाः संख्याय् तकं लिउने लाकातःपिं बौद्धतय् सही ल्याः पिकायेत आःया जनगणना ताःलायेमाः ।

More Stories Like this