स्वायत्त नेवाः गणराज्य घोषणा

२४० दँ न्ह्यवंनिसें जारी जुयाच्वंगु एकात्मक शासन व्यवस्थाया अन्त्य यासें वःगु संघीय गणतान्त्रिक व्यवस्थायात संस्थागत यायेगु झ्वलय् एनेकपा (माओवादी) पाखें म्हिगः नेवाः स्वायत्त गणराज्य घोषणा यात। राष्ट्रिय स्वाधिनता रक्षा या, वैदेशिक हस्तक्षेप बन्द या, नागरिक सर्वोच्चता कायम या धइगु नारा बिसें म्हिगः बसन्तपुली छगू तःजिगु ज्याझ्वःया दथुइ उगु घोषणा याःगु खः। थुगु घोषणां अग्राधिकार सहित नेवाः जातिया बाहुल्यता दुगु लागा व गाविस नापं ऐतिहासिक स्वनिगः स्वतन्त्र रुपं नेवाः भूमिइ लाःगु खँयात नं स्वीकार याःगु दु ।

नेवाः स्वायत्त गणराज्य घोषणाया ज्या नेवाः वसः हे पुनाः दबुली दं झाःम्ह एनेकपा (माओवादी) या अध्यक्ष प्रचण्डं यानादीगु खः। वय्कलं त्वाःदेवाय् मत च्याकाः नेवाः गणराज्य घोषणा यायेवं सर्गतय् फायर यानाः बढाइँ यासें उकियात लसकुस याःगु खः। लिसें 'नेवाः स्वायत्त राज्य जिन्दावाद' धकाः च्वयातःगु ब्यानर सहितया बेलुन सर्गतय् ब्वयेकूगु खःसा उकिया नापनापं सर्गतय् आतिशबाजी नं याःगु खः। उगु इलय् नेवाः बाजंया मंगल धुन थाःगु खःसा उपस्थित सकस्यां लापा थानाः लसकुस याःगु खः ।

ज्याझ्वःयात संवोधन यासें माओवादीया अध्यक्ष प्रचण्डं थौंया न्हि नेवाः आदिवासीया मुक्तिया न्हि खः धयादिल। वय्कलं धयादिल, 'नेवाः स्वायत्त गणराज्यया निर्माण धइगु राष्ट्रयात क्वातुकेगु ज्याझ्वः खः ।'

संयुक्त नेवाः समितिया नायः दिलबहादुर श्रेष्ठं सामन्ती राज्य सत्ताया विरोधय् जुयाच्वंगु आन्दोलनया दकलय् उत्कर्ष धइगु थ्वहे नेवाः स्वायत्त गणराज्यया घोषणा खः धयादिल। नेवाः राष्ट्रिय मुक्ति मोर्चाया न्वकु हिसिला यमिं नेवाः स्वायत्त राज्य घोषणां हे नेवाःतय्त आर्थिक, सामाजिक, सांस्कृतिक विकासय् न्ह्यःने यंकीगु बिचाः प्वंकादिल ।

नेपाः राष्ट्रिय पार्टीया नायः डा. केशवमान शाक्यं २४० दँ लिपा नेवाःतय्सं आः नकतिनि जक मुक्तिया सासः ल्हाये खन धासें थौं जूगु थ्व घोषणा हे न्हूगु नेपालय् वःगु हिउपाःया लिच्वः खः धयादिल। नेवाः देय् दबूया नायः नरेश ताम्राकारं शाह जुजु पृथ्वीनारायण शाहं बसन्तपूरया थ्वहे ऐतिहासिक थासं एकाधिकार शासन शुरु याःगु खःसा आः नेवाःतय्सं थ्वहे थासय् च्वनाः थःपिनि मुक्तिया घोषणा यासें उगु एकाधिकारया अन्त्य याःगु दु धयादिल। लिसें वय्कलं नेवाः स्वायत्त राज्य मंकाः संघर्ष समितिं आः वइगु पुस ११ गते दशरथ रंगशालाय् जुइगु नेवाः स्वायत्त राज्य घोषणा ज्याझ्वलय् ब्वति कयादीत नं सकसितं आह्वान यानादिल ।

नेवाः देय्गू नेपालमण्डलपाखें डा. चुन्दा वज्राचार्यं बसन्तपूया दबुली कुमारी व कालभैरबयात साक्षी तयाः जूगु थ्व स्वायत्त गणराज्यया घोषणा नेवाःतय् मुक्ति व स्वतन्त्रताया घोषणा खः धयादिल। नेवा जागरण मञ्चया कजि सुजिव वज्राचार्यं अग्राधिकार व स्वशासन धइगु नेवाःतय् अधिकारया हे खँ खः धयादिल ।

ज्याझ्वलय् नेपालभाषा आन्दोलनया न्ह्यलुवाःपिं सत्यमोहन जोशी, मल्ल के. सुन्दर, ज्यापु महागुथिया विपिन महर्जन, मोहनकृष्ण श्रेष्ठ, ज्यापु समाज यलया प्रतिनिधि नापं माओवादी पार्टीया मेपिं वरिष्ठ पदाधिकारीतय् नं उपस्थिति दुगु खः। ज्याझ्वलय् नेवाः संस्कृति पिलुइगु झाँकीया नापं सांस्कृतिक ज्याझ्वः नं न्ह्यब्वःगु खः। सभा न्ह्यः स्वनिगःया न्यागू थासं सांस्कृतिक बाजं सहित जुलुस पिकयाः बसन्तपुली मुं वःगु खः। ज्याझ्वलय् नेवाः स्वायत्त राज्य मंकाः संघर्ष समितिया भिंतुना सन्देश नं ब्वनाः न्यंकूगु खः।
ज्याझ्वःया सुरक्षा नेवाः राष्ट्रिय मुक्ति मोर्चाया ल्याय्म्ह कार्यकर्तातय्सं मुक्कं बसन्तपू लागा घेरे यानाः याःगु खः ।

More Stories Like this