माओवादीपाखें नेवाः गणराज्यया घोषणा

एनेकपा (माओवादीं) म्हिगः येँय् छगू तःजिगु ज्याझ्वः यासें नेवाः स्वायत्त गणराज्य घोषणा यात। माओवादीं छुं ई न्ह्यः हे थ्व घोषणा यायेगु धकाः क्वःछिनातःगु खःसां म्हिगः बल्ल थ्व ज्या सम्पन्न जुल। माओवादीया अध्यक्ष प्रचण्ड थःहे वयाः थ्व घोषणा यानादीगुलिं पार्टीं नेवाः स्वायत्त राज्ययात उच्च महत्व बिउगु खँ नं सीदु ।

खतुं माओवादीं थ्व ज्यायात छगू कथंया प्रचारात्मक जक खः धायेगु यानाच्वंगु दु। वास्तवय् थ्व छगू प्रचारात्मक ज्या जक नं खः। छाय्धाःसां आः घोषणा याःगु नेवाः राज्यया सिमाना, प्रमुख आदि छुं हे आधारभूत खँ माओवादीं स्पष्ट याःगु मदुनि। अथे खःसां थ्व घोषणा यानाः माओवादीं थःपिंसं जनयुद्धकालंनिसें ल्ह्वना वयाच्वनागु जातीय राज्य पलिस्थाया मागयात पूवंकेत थःपिं अझ नं प्रतिवद्ध खःनि धइगु खँया विश्वास जनतायात बीत धाःसा ताःलाःगु दु ।

माओवादीं धायेगु याना वयाच्वंगु जातीय प्रदेशया खँ भ्वँतय् जक सीमित मखु, थ्व यथार्थय् नं दु धकाः प्रस्ट यायेगु ज्या नं थुकिं जूगु दु। थथे सार्वजनिक रुपं हे जातीय राज्यया घोषणा यायेधुंकाः माओवादी आः गबलें नं थ्व अडानयात त्वःताः मेखे लीगु सम्भावना मंत। नेपाःयात धाथें हे संघीय प्रणालीइ यंकेगु छगू कथंया ग्यारेन्टी खः थ्व घोषणा। मेमेगु प्रदेशया घोषणा सामान्य खःसां नेवाः गणराज्यया घोषणा विशेष खः। छाय्धाःसां २४० दँ न्ह्यः पृथ्वी नारायण शाहं थ्व राज्य त्याकेधुंकाः तिनि नेपाः एकीकरणया ज्या पूवंगु घोषणा याःगु खः। उकिं थन गणराज्य घोषणा जुइधुंकाः हे तिनि एकतन्त्रीय शासनया अन्त जुल धकाः आधिकारिक रुपं धाये फइगु नं स्वाभाविक जुल ।

More Stories Like this