संविधानसभा भंग छाय् ?
माओवादी हावी संविधान भारतयात मयः
माओवादी प्रभाव पनेत दवाव
संविधान निर्माणय् कडा निगरानी
येँ (सन्ध्या टाइम्स)/संविधानसभाया थीथी समितितय्सं तयार यानाच्वंगु थीथी विषयया अवधारणात माओवादी बिचाःपाखें प्रभावित जुयाः पारित जुयाच्वंगुलिं थ्व संविधानसभापाखें यदि न्हूगु संविधान दयेकल धाःसा उकिं 'माओवादी संविधान' दयेकीगु विश्लेषण भारतं याना हःगु खँ सीदुगु दु। वर्तमान संविधानसभां दयेकीगु संविधान माओवादीपाखें अत्यधिक प्रभावित जुइगु सम्भावना खने दयाः हे भारतं थ्व संविधानसभा भंग यानाः राष्ट्रपति शासन लागू याकेगु कथंया बिचाः प्रवाहित याना हःगु खँ छगू विज्ञ सूत्रं धाःगु दु ।
वर्तमान संविधानसभा विघटन यानाः देशय् राष्ट्रपति शासन लागू यायेगु व छगू चीधंगु संविधान आयोग खडा यानाः उकिं हे न्हूगु संविधान दयेकेगु प्रस्ताव कांग्रेसया छुं नेतातय्सं न्ह्यःने हःगु धकाः छुं न्हि न्ह्यः एमालेया छम्ह नेतां सार्वजनिक याःगु खः ।
सूत्रं बिउगु जानकारी कथं कांग्रेस मार्फत एमालेयात वंगु उगु प्रस्तावया मुख्य सूत्रधार वास्तवय् भारत खः। भारतं नेपालय् माओवादी प्रभावित संविधान दयेकीगु जुल धाःसा उकियात थःपिंसं स्वीकार याये मफइगु बिचाः न्ह्यःने हयाच्वंगु दु। छुं न्हि न्ह्यः भारत भ्रमणय् वंपिं एमाले अध्यक्ष झलनाथ खनाल व फोरम अध्यक्ष उपेन्द्र यादवयात भारतं थ्वहे 'सन्देश' बियाहःगु खः ।
थौंकन्हय् संविधानया थीथी अध्याय दयेकेगु ज्याय् खटे जुयाच्वंगु संविधानसभाया समितितय्सं तयार याना हःगु अवधारणात माओवादी बिचाःपाखें हे प्रभावित जुयाच्वंगु खने दयाच्वंगु दु। सर्वोच्च अदालतया प्रधानन्यायाधीश नियुक्ति, प्राकृतिक स्रोत परिचालन सम्बन्धी प्रणाली, राज्यया शासकीय स्वरुप सम्बन्धी अवधारणा अप्वः यानाः माओवादीं गथे धाल अथे हे तयार जुयाः पिहां वयाच्वंगु दु। आः उकियात संविधान सभाय् तयाः छलफल याइबलय् नं गथे खः अथे हे पारित याइगु सम्भावना यक्व दु। थुकियात सतिक च्वनाः अध्ययन यानाच्वंपिं भारतीय विश्लेषकतय्सं आः नेपाःया संविधान माओवादी बिचाःपाखें प्रभावित जुयाः हे पिहां वइगु जुल धइगु निष्कर्ष पिकासें थ्व संविधानसभापाखें न्हूगु संविधान दयेके हे मबीगु षडयन्त्र शुरु याना हःगु खँ नं सूत्रं धाःगु दु। थौंकन्हय् संविधान च्वयेगुपाखे सत्तारुढ पार्टीतय्सं छुं हे ध्यान मबियाच्वंगुया मू कारण थ्वहे खः धाःगु दु ।
सूत्रया कथं संविधान निर्माणय् खने दयाच्वंगु थ्व माओवादीया हावीयात मेमेगु पार्टीतय्सं पने फइगु खः लाकि मखु धकाः भारतं विश्लेषण यायेत स्वयाच्वंगु दु। यदि मफइ थें खने दत धाःसा भंगपाखे हे भारतया जोड जुइगु खँ नं सूत्रं धाःगु दु ।
