न्हूगु भर्ती छाय् ?

सम्पादकजु,




सेना समायोजनया ज्या न्ह्यानाच्वंगु इलय् नेपाली सेनां न्हूगु भर्ना कयाच्वंगु बांलाःगु ज्या मखु । देशय्
शान्ति प्रकि्रया न्ह्यानाच्वंगु ला सकस्यां सिउगु हे खँ खः । शान्ति प्रकि्रया शुरु जूबलय् 'छु गुगु अवस्थाय् दु वहे अवस्थाय्' धकाः सेनायात तयेगु धकाः धाःगु खः । वहे सहमति कथं जनमुक्ति सेनायात थीथी शिविरय् तयेयंकूगु खः । उपिं शिविरय् ख्वाउँ व तांन्वः मधासे गज्याःगज्याःगु रोगव्याधीयागु तकं सामना
यानाः च्वनाच्वंगु दु । तर थुखेपाखे वयाः आः वयाः तिनि नेपाली सेना जूगु पुलांगु शाही नेपाली सेनां धाःसा धमाधम न्हूगु सेना भर्ती कयाच्वंगु दु । थ्व ला सीधा हे शान्ति सम्झौताया उल्लंघन खः । दछि निदँ
न्हूगु सेना भर्ती मयायेवं सुयातं छुं पाइगु खँ मखु । यदि नेपाली सेनाय् न्हूगु भर्ती हे कायेमाःगु खःसा वहे
शिविरय् च्वनाच्वंिपं जनमुक्ति सेनापाखें हे भर्ती यानाः काःसां जीगु खः । थथे यायेबलय् माओवादीं धाः थें
सेना समायोजनया प्रकि्रया नं शुरु जुया वनीगु व अन शिविरय् च्वनाच्वंपिं सैनिकतय् लागिं राज्यया कोषपाखें यानाच्वंगु खर्च नं घटे जुइगु खः । नेपाली सेनाय् समायोजन यानाः दुकायेमाःपिं देशया लगिं ज्यान बीत तयार जुयाच्वंपिं हजारौं सैनिकतय्त शिविरय् बन्दी थें कुनाः नेपाली सेनाय् मेपिं हजारौं पिनेयापिं मनूतय्त सेनाया रुपय् भर्ती यायेगु धइगु थ्व ला तप्यंक हे देशया न्हूगु परिस्थितियात मथुइकूगु ज्या खः । थुकिं द्वन्द्वयात समाधान मयासे हानं मेगु तःधंगु द्वन्द्व पिकायेगु ज्या जक याइ । नेपाली सेनां देशया अवस्था छु जुयाच्वंगु खः व ला मसिउगु खइ मखु । सीक सीकं अथे यानाच्वंगु दुसा सुयागु निर्देशनय् यानाच्वंगु खः नेपाली जनतां सीकेमाःगु दु ।

More Stories Like this