थौं नेवाः गणराज्य घोषणा

थौं हे ताम्सालिङ गणराज्य नं घोषणा

येँ (सन्ध्या टाइम्स)/एकीकृत नेकपा (माओवादी)या संयुक्त राष्ट्रिय जनआन्दोलन नेपाःया नेवाः राज्य समितिं थौं येँया वसन्तपुली छगू तःजिगु सभा यासें नेवाः स्वायत्त राज्य घोषणा यायेत्यंगु दु ।

माओवादी अध्यक्ष प्रचण्ड थम्हं हे नेवाः स्वायत्त गणराज्य घोषणा याइगु ग्वसाः दु। ज्याझ्वलय् माओवादीया थीथी नेता नापं नेवाः ख्यःया न्ह्यलुवाःपिंसं नं न्ववानादीगु ज्याझ्वः दु। बसन्तपुली सभा याये न्ह्यः माओवादी नेता कार्यकर्तातय्सं लैनचौर, कालिमाटी, कुपोण्डोल, माइतिघर मण्डला व मैतीदेवी लागां नेवाः सांस्कृतिक बाजं सहित नेवाः वसः पुनाः ततःधंगु र्‍याली पिकायेगु नं तयारी यानाच्वंगु दु। फुक्कं र्‍याली बसन्तपुली वयाः क्वचायेवं नेवाः स्वायत्त राज्य घोषणाया ज्याझ्वः न्ह्याकेगु खँ ग्वसाः खलकं धाःगु दु ।

उगु हे कथं थौं हे माओवादीं नुवाकोटया रानीपौवा लागाय् ताम्सालिङ स्वायत्त गणराज्य घोषणा नं यायेत्यंगु दु। माओवादीया उपाध्यक्ष डा. बाबुराम भट्टराईं ताम्सालिङ स्वायत्त गणराज्य घोषणा यानादीगु ज्याझ्वः दु। माओवादी पार्टीं झिंन्यागू राज्य घोषणा यायेगु धकाः स्वंगूगु चरणया संघर्ष न्ह्याकूगु खःसा आः तकया दुने भोटे-लामा, लिम्बुवान, किराँत, थारुवान, कोचिला, सेती-महाकाली व भेरी-कर्णाली गणराज्य घोषणा यायेधुंकूगु दु ।
उखे थौं च्वंगु संवैधानिक समितिया बैठकय् माओवादीं संविधान सभाय् च्वनाः यायेमाःगु ज्या सतकय् च्वनाः यात धकाः आलोचना जूगु दु।