धकिं लिउनेया आशक्तिं नं आस्रव क्षय मजू

लोकबहादुर शाक्य

प्रज्ञाचक्षु दत: अकुशल कर्म फुत:

शुद्ध चित्तं बियागु दानपाखें पुण्य प्राप्त जुइ। तर गुम्ह व्यक्ति अथवा स्वयं प्रव्रज्जित जुल कि दान स्वयाः नं अप्वः पुण्य लाइगु जुल। शील रक्षा याना तये फतकि पुण्य यक्व दयाः सुख भोग नं याये फयाच्वनी। बुद्धया शासनय् प्रव्रजित जुइगु तातुनाः निर्वाण प्राप्त यायेगु खः। रत्नधनपाखें निर्माण जूगु स्तुप चैत्य आदि मूर्खजनपिंसं स्यंकेफु अथवा खुयाः नं यंकेफु। तर प्रव्रज्याया पुण्य सुनानं खुया कायेगु अथवा यंके फइ मखु। थौंकन्हय्या वैज्ञानिक युगय् चिकित्सकतय्सं मिखां मखंपिंत उपचार यानाः अथवा मरण जूपिनि मिखा कयाः छुनाःलि मिखां खंका बीगु पुण्य जुल। गबलें मूर्खतय्सं मेपिंत सास्ति यानाः मिखा लिकायेत्यंम्हेसित रोके यानाः उद्धार याये फतकि तःधंगु पुण्य लाइगु जुल। हानं सुनां सुयातं अथवा थःत प्रव्रज्या यानाबिल अले यात कि थवंथः मार्ग दर्शन जुयाः कल्पकल्प तक अनुत्तर प्रज्ञाचक्षु जुयाः पुण्य नं लाइगु जुल। थःम्हेसिनं याःगु कामना बांलाक पूर्ण जुइ फइ। थ्वया हेतु धइगु पाप नष्ट यानाः कुशल कर्म यायेगु खः। यथार्थ थुइकेमाःगु सत्य तथ्य खँ राग, द्वेष व मोह निवारण यानाः अकुशल कर्म मयासे कुशल कर्म उत्पादन याये फइगु जुल ।

आँटयात वैसं मपं:

डा. अनोजा गुरुमांया 'शान्ति अभिप्रेरणा' सफुली न्ह्यथनातःकथं यदि सुं व्यक्ति प्रव्रजितया कारण जुल अथवा थःथम्हं प्रव्रजित जुलकि परिशुद्ध पुण्यपाखें वयागु दक्व क्लेश मलया क्षय जुयाः भव दुःखया लँपु दिकाः निर्वाण चूलाकेया हेतु जुयाः निर्वाण प्राप्त जुइगु जुल। जवान वा बुरा न्ह्याम्ह नं प्रव्रजित जुलकि इमिगु पुण्य उत्तम तथा महान जुइ। बुद्धया इलय् राजगृहया श्रीजात नांम्ह १०० दँया वयोवृद्ध छेँथुवालं प्रव्रजित जीवनया गुण न्यनाः जहान परिवार सकसिकें बिदा कयाः बेलुवन विहारय् वन। उगु इलय् बुद्ध धर्म प्रचारया निंतिं पिने बिज्यानाच्वंगु जुयाः सारिपुत्र भन्ते समक्ष वनाः प्रव्रज्या यायेत इनाप यात। थ्व बुरा ध्यान च्वने नं फइ मखु, धर्म प्रचार नं याये फइ मखुगुलिं प्रव्रज्या जुइगु अवस्था मदयेधुंकल उकिं छेँय् लिहां हुँ धकाः सारिपुत्र भन्तेनं आज्ञा जुल। अनंलि महाकश्यप, उपालि, अनिरुद्ध आदि अरहन्त भन्तेपिंथाय् वनाः नं प्रव्रज्या जुइ मफुसेंलि दिक्क जुयाः ख्वयाच्वन। उगु इलय् भगवान बुद्ध बेलुवन बिहारय् बिज्यात। श्रीजात बुराया खँ न्यनेधुंकाः बुद्धं बुरायात प्रव्रज्या यायेत महामौद्गल्यायनयात आज्ञा जुयाबिज्यासेंलि १०० दँ दुम्ह बुरायात दीक्षा बियाः उपसम्पदा बिल। थाकुसां बुरां ध्यान भावना यानाः अल्छि तथा दुःख मचासे सह यानाः चित्त शुद्ध तथा कठीन चर्या पालना यानाः राग-द्वेष-मोह निर्मूल यासें तृष्णा निवारण यानाः अरहन्त जुयाबिज्याःगु ऐतिहासिक घटना दु। १०० दँया खँ मखु चित्तया कारण खः। मेहनत यायेमाः। मेपिंसं शिक्षा जक बीफइ। थम्हं हे चायेकाः चित्तयात कःघानाः चर्या यातकि बुराया अवस्थाय् नं अरहन्त जूगु ग्यसुलाःगु दसु खः थ्व ।

कल्याणमित्र न्हाय्कं थें खः

यथार्थ रुपय् बुद्ध धर्म व्यापक रुपं प्रचार प्रसार यायेत प्रव्रज्जित जुयाबिज्याःपिनिगु महत्वपूर्ण भूमिका सर्वव्यापी दु। भिक्षु जुइत २२७ गुण तथा भिक्षुणी जुइत ३११ गुण दयेकेमाःगु नं उतिकं महत्वपूर्ण जुल। उलिमछि विनय नियम पालन याये धइगु चाःचू मखु। तर च्वय् न्ह्यथनातःकथं १०० दँ दुम्ह ज्याथ हे भिक्षु जुयाः कठिन चर्या यानाः अरहन्त जुयाबिज्यात। थौंकन्हय् नं नेपालय् सलंसः भिक्षु भिक्षुणीपिंसं बुद्ध धर्म प्रचार यानाच्वंगु दु। तर अरहन्त जुयादीपिं न्यने मदुनि। थन न्ह्यथनेमाःगु खँ छु धाःसा कमी कमजोरी दुसा सुधार याना वनेमाल ।

वंगु मंसिर संल्हू कुन्हु यल लाय्कुली च्वंगु विश्व मैत्री विहारय् भिक्षुणी अमरावतिं धर्म देशनाया झ्वलय् थःके नं द्वंगु दुसा प्रकाश याःसां जिउ धयाबिज्याःगु च्वछायेबह जू। गुरुमामं धर्मदेशना न्यनाः मन बसय् तयाः मेपिंत बांलाक व्यवहार यायेमाःगु खँ न्ह्यथँसें अकुशल ज्या खँयात कुंखिनाः सुधार यायेत सुझाव बीपिं कल्याणमित्र खः धकाः देशना यानाबिज्यात ।

बेथिति पनेगु नं पुरुषार्थ:

छक्वः यलया हिरण्यवर्ण महाविहारय् श्रद्धेय रिम्पोचें धर्मदेशनाया झ्वलय् 'ला नये मजिउगु खः। तर जिं ला नया' धकाः अजूचायेक न्ववानाबिज्यात। न्ह्यसःया झ्वलय् छम्ह उपासकं धर्मया नामय् ला नल कि ला पञ्चशीलया पाणातिपाना छगू शील लिकायेमाल धाल। मेम्ह उपासकं धर्म गुरुं ला नया धयाबिज्याः थें गुगुं नं गुम्बाय् ला नःगु खने दुगु ला तृष्णा उत्पन्न जूगुलिं खः। आवंलि थज्याःगु बानी गुरुं परित्याग याये माल धकाः सुझाव बिल। थुगु इलय् गुरुजुं ख्वाः गर्खेसे च्वंकूगु खनेदत। २२७१ औं शस्त्र परित्याग दिवसया लसताय् विपली थेरवाद बुद्ध बिहारय् जूगु छवाःयंकया ज्याझ्वलय् छन्हु अखिल नेपाल भिक्षु महासंघया सचिव भिक्षु धर्ममूर्तिं नैतिक शिक्षा विषयय धर्मदेशना बियाबिज्याये धुंकाः वसपोल समक्ष उपासक आनन्द प्रधानं भिक्षु भिक्षुणीपिंसं मांस भक्षण यानाच्वन धकाः न्ह्यसः तःबलय् पशुपंक्षी स्याःगु खंगु तथा थःत धकाः हःगु ला नं थःगु निंतिं स्यानाहःगु शंका वंसा नये मजिउ, मेगु नय जिउ धकाः लिसः बियाबिज्याःगु मनूतय्त चित्त बुझे मजूगु जुयाच्वन। थज्याःगु प्रकारं प्रव्रजित जुयाबिज्याःपिं मान्यजनपिंसं ला नयाः तृष्णा उत्पन्न यायेगु हिसि मदु धकाः बय्बय् जुल। थ्व विषयस श्रद्धेय भन्ते कोण्डन्ययाके न्यंबलय् थज्याःगु खँपाखें सर्वसाधारणपिंत भ्रम उत्पन्न जुइगु जुयाः जिम्मेवार प्रव्रजित भिक्षुपिंसं सार्वजनिक सभाय् न्ववायेबलय् अतिकं बिचाः यानाः जक न्ववायेमाः। ध्वाथुइक न्ववाये मफुत कि भ्रम श्रृजना जुइगुलिं न्वमवायेगु अझ भिनी धयाबिज्यात। उकिं गनं कमजोरी जूवंसा सुधार यानाः बुद्ध शासन क्वातुके नितिं थःथम्हं पलाः छी मालाच्वन। थुगु निंतिं सम्बन्धित निकायं नं माःकथं व्यवस्था यायेत ध्यान आकर्षित याना ।

More Stories Like this