काँठ लागां माग यानाहःगु स्वायत्त क्षेत्र

येँ व स्वनिगःया पिने लागाय् चाकःछिं च्वंगु काँठ लागाया खस ब्रम्हूतय्सं नं थःपिंत काँठ स्वायत्त प्रदेश माः धकाः अभियान न्ह्याकेगु तयारी यानाच्वंगु समाचार पिहां वःगु दु। छथ्वः खस ब्रम्हूतय्सं न्हापा न्हापा ला देय् छगुलिं हे जिमिगु खः उकिं थःत नेपाः छगुलिंया हे हकदार दयेकेमाः धइकथंया अभिव्यक्ति बीगु याइगु खः। आः देशय् संघीय व्यवस्था लागू जुइवं खस ब्रम्हूतय्सं नं थ्वहे व्यवस्था दुने थःपिनि लागिं छकू भूमिया व्यवस्था यायेमाः धकाः माग याःगु गलत थ्यंक मखु। उपिं नं थ्व देय्या बांलाःगु हे संख्या दुपिं नागरिक जूगु ल्याखं उमिगु नं बिस्कं प्रदेश दयेमाः धइगु खँय् सुयां निगू मत दइ मखु। अज्याःगु प्रदेश दयेमाः धकाः उमिसं माग याःगु सकारात्मक खः ।

तर नेवाःतय्सं आदिकालंनिसें उपभोग याना वयाच्वंगु भूभाग दुने हे थःपिनि प्रदेश दयेमाः धकाः माग यायेगु धाःसा पूरा हे दुराशय जक जुइ। खस ब्रम्हूतय् बिस्कं प्रदेशया रुपय् सेती-महाकाली, भेरी-कर्णाली आदि लागात प्रस्तावित जुयाच्वंगु दु। अन उमिसं थःपिनि स्वायत्त राज्यया ध्वाँय् ब्वयेकेफु। यदि अन वने मास्ते मवःगु खःसा नेवाः प्रदेश दुने हे च्वनेगु अधिकार नं उमित दु तर नेवाः प्रदेश दुने च्वनेबलय् नेवाः प्रदेशया कानून व नियमत पालना याये माली। काँठ लागाया गुगुं थासय् खस ब्रम्हूतय् बाहुल्यता दुसा अन 'स्वशासन दुने स्वशासन' धइगु सिद्धान्त कथं अधिकार बीगु ज्या नं जुइफु। उपाय मदुगु मखु। अज्याःगु उपाययात त्वःताः देशय् वयेत्यंगु न्हूगु प्रणाली हे ध्वस्त याये धइगु नियत तयाः जक न्ह्यःने वये मजिउ। नेवाः राज्यं सुयातं ककुतिनाः पितिने धाःगु मदु, थ्व खँ लुमंके ।

More Stories Like this