सहिद शिरोमणि !

शिला साय्मि

थौंकन्हय् चर्चाय् वयाच्वंगु छगू विषय बाराया गढिमाई मेला खः। लछि न्ह्यवंनिसें पत्रपत्रिकाय् हिंसाया विरोध यानातःगु च्वसुत ब्वने दयाच्वन। अथे हे टेलिभिजन, एफएमपाखं नं थुकिया आपालं समाचार पिहां वल। उलि जक मखु आधुनिक बुद्ध धाःम्ह राम बमजन लगायत आपालं धार्मिक संघ संस्थां उगु मेलाय् जुइगु पशुबलिया विरोध याःगु खने दत। तर नं बलियात धाःसा पने फुगु खने मंत ।

म्वायेगु असिधकार सकसिगुं खः। प्राणी हिंसा पाप खः। अथे नं मनूतसें स्यायेगु त्वःती ला? उमिगु निंतिं हिंसा पाप मखु धर्म खः। छाय्धाःसां दकलय् न्हापां ला साक्क नये दत। अले १२१ म्ह म्येय् स्याइपिं मनूतय्त ध्यबा दत। हानं नेपाः विश्वय् हे दकलय् अप्वः बलि बीगु देय् धकाः कीर्तिमान नं कायम जुइगु जुल ।

थुगुसीया गढीमाई मेलाय् म्येय् जक २०,०००, दुगु २,००,००० व खा, हँय् अल्याख हे बलिया नामय् स्यात। थ्व आः जक मखु, परम्परांनिसें हे न्ह्यानाच्वंगु प्रथा खः। चाहे द्यः पाःलाया म्हगसय् खनाः न्ह्याःगु परम्परा जुइमा, वाय् स्वइच्छां न्ह्याःगु जुइमा। हलिमय् हे थ्व मेला नां जाः। निन्हुया दुने लखौं मनूत मेलाया नामय् नेपाः वल धायेबलय् थ्व नेपाःया निंतिं नं गौरवया खँ खः। थ्व मेला नेपाःया दकलय् तःधंगु मेला नं जुइफु। छाय्धाःसां पहाडै पहाडं भुनाच्वंगु देय्या गुगुं छगू कुंचाय् धर्मया नामय् जूसां लखौं मनू मुं वल धायेबलय् थुकियात नेपाःमितय्सं गौरवया हे विषय कथं काये माली।
झीगु येँ देशय् नांजाःम्ह जनबहाः द्यः खः गुम्ह नेपाः देय्या राजधानीइ सकस्यां माने यानातःम्ह द्यः नं खः। तर थ्व द्यःया जात्रा जूसा निद्वः मनू हे खाके मफु। गुम्ह करुणामयं देय्यात लहिना तल। तरवहे द्यःया जात्रा जुइबलय् ब्वति काः वइपिं मदु। पाहांचःर्‍हे धाःसा द्यः क्वबीपिं ज्यापु, बाजंखलः साय्मि। थ्व ज्यापु व साय्मितय्गु जक नखः ला धइथें च्वं। द्यः तक नं क्वबीपिं मदयाः म्हय्पि अजिमाया जात्राय् म्हतिं न्यासःदां ज्याला बियाः द्यः क्वबीकेमाःगु सुनां मसिउ?
गुपिं द्यःपिंत झीसं अजिमा व भैरःद्यः धयाच्वना, देय्या रक्षा यानाच्वंपिं धकाः नालाच्वना, उपिं द्यःतय्सं हे नये त्वने मखन धाःसा देय्या अवस्था छु जुइ ?

झीसं न्यनातयागु दु, निक्वःगु विश्व युद्धय् गुह्यश्वरी गालय् लः न्ह्याये मदयावन। न्ह्याक्व लः प्वंकूसां ल्हातं न्ह्याये मफु। युद्ध त्यासेंलि अथें लः जायावल हं। अथे हे वंगलय् च्वंम्ह आजुद्यःयाके चःति हुकु हुकुं मगाः धाःगु, अथे हे युद्धय् ल्वानाच्वंपिं सिपाहिंत दक्वं माहांकाःद्यःया रुपय् खनाः शत्रुत मल्वासे बिसिउँ वन धाःगु खँ नं मन्यनागु मखु। उलि जक मखु न्हापा न्हापा मल्ल जुजुपिनि पालय् सुं विदेशी शक्ति नेपाः न्याये धकाः वल हं। जुजुया चछिचछि न्ह्यः मवः, तसकं धन्दा जुयाच्वंगु इलय् पशुपति महाद्यः बिज्यानाः फटकिरीयाम्ह थुसा छम्ह बियाः व थुसा त्वपुक मू कयाः देय् मिया छ्व धकाः उजं जुल हँ। सुथय् जुसेंलि जुजुं थःगु क्वथाय् च्वंम्ह फटकिरीयाम्ह थुसा ज्वनाः देय् न्याः वःम्हेसित थुसा त्वपुक ध्यबा माः धाल हं। देय् न्याःवःम्ह तसकं अजूचायाः प्यलांगुयाम्ह थुसा त्वपुक पाँय्म्वः फ्वनीम्ह जुजु गुलि मूर्ख धकाः मतिइ तयाः लय्लय् तायाः छब्वरा दां ज्वना वल हं। व दामं थुसाया म्ह फुक्कं त्वपुल हं, तर लिउनेया ग्वारा छगः धाःसा त्वमपू हं। हाकनं मेगु बोरा दां प्वंकल। अझ नं त्वमपुल। हाकनं छबोरा, हाकनं छबोरा यायां पशुपति देगः छगलं त्वपुइ धुकल तर थुसाया ग्वारा छगः त्वपुइ मफु हं। अले कायल जुयाः ध्यबां देय् न्यायेगु इच्छा नं त्वःताः लिहां वन धइगु बाखं न्यनातयागु दु ।

बाखंया आधारय् पशुपति महाद्यःया न्ह्यःने च्वंम्ह तःधिकःम्ह लुँयाम्ह थुसा व हे खः धइगु किंवदन्ती दु।
थौंकन्हय् येँयापिं मनूत स्वयां पिनेयापिं मनूत थन अप्वयावल। द्यः माने यायेगु पहः मसिल। थम्हं धइथें यायेमाःपिं नापं चिपनिप मदयाः नियम नीति छुं मदुगुलिं देशय् अशान्ति अप्वया वल। द्यः दयाः नं द्यःया शक्ति क्षीण जुयावन। गथे छेँया हामायात छेँजःपिंसं हनाबना मतल धाःसा छेँ स्यनी अथे हे झीगु नेपाःया अवस्था नं जुयाच्वन।
आन्दोलन व हडताल न्ह्याबलें जुल। स्कूल, पसः न्ह्याबलें बन्द। मचा काः वनेमाःपिं मांबौ न्ह्याबलें भःभः न्हू। बिरामी अस्पताल यंके माःसा बिरामी ला छु बिरामी यंकीपिं मनूतय्गु तक नं सुरक्षा मदु। अथे नं आन्दोलनय् सीपिं मनूतय्त सहिद घोषणा यायेमाः। क्षतिपूर्ति बीमाः। थ्व छु विडम्बना मखुला ?

क्वथाय् च्वनाः मोजमस्ती यायेगु, काय्म्ह्याय् थःथिति करोडपति यानाः देय्यात अनिकालय् लाकेगु, गुण्डा लहीगु, लँय् लँय् मनू स्यायेगु, स्वतन्त्रं ज्या यानाः निछाः नयाच्वंपिं मनूतय्गु लजगाः लाकेगु, थःगु बुद्धि खतं नकाः विदेशीतय् बुद्धिइ प्याखं हुलीपिं नेतातय्गु निंतिं थःगु ज्यान बीपिंत सहिद धाःसा, मनूया प्वाः थनेत थःगु जिउ पाइपिं, मनूतय्गु इच्छा पूवंकेत थःगु जिउ पाइपिंत सहिद छाय् मधायेगु? कम से कम थुमिसं सहिदतसें मयाःगु वा याये मफुगु ज्या ला याःगु दु। छेँ मदुपिंत छेँ बिउगु दु। बाय् मदुपिंत बाय् बिउगु दु। ध्यबा मदुपिंत ध्यबा बिउगु दु। ल्वापु जूगु छेँ वा मुद्दा दुपिनि मुद्दा त्याका बिउगु दु। विदेश वनीपिंत लजगाः बियाच्वंगु दु। थुलिमछि गुण याःपि पशुतय्त सहिद जक मखु सहिद शिरोमणि हे धाःसां पाइ मखु। अभागी ला व पसलय स्याःपिं मखा जुल। गुपिं न सहिद धायेके दत, न त गिनीज बूकय् हे नां तये खन। झीथाय् न्हिछिया ग्वःम्ह म्येय् स्याइ, ग्वःम्ह खा स्याइ धइगुया लगत ला दु तर ग्वःम्ह मनू स्याइ धइगु खँय् धाःसा सुनां चिउताः तयाच्वंगु मदु ।

More Stories Like this