काँठयात बिस्कं राज्य माग

नेवाः स्वायत्त राज्य विरुद्ध षडयन्त्र ?

येँ (सन्ध्या टाइम्स)/स्वनिगः लगायतया लागा स्वानाः नेवाः स्वायत्त राज्य दयेकेगु तयारी जुयाच्वंगु हे इलय् थ्व क्षेत्रया खास यानाः काँठ लागाय् च्वंपिं खस ब्रम्हूतय्सं थःपिनि स्थिति सुरक्षित जुइमाः धइगु नामय् थीथी कथंया गतिविधि शुरु याना हःगु खँ सीदुगु दु ।

उमिसं थःपिं नं थ्व लागाया पुलांपिं वासिन्दा खः धासें नेवाः स्वायत्त प्रदेश दुने मच्वँसे बिस्कं राज्य माः धकाः माग याना हःगु खँ नं सीदुगु दु। काँठ लागाया खस ब्रम्हूतय् अधिकार सुरक्षित जुइमाः धइगु सः तयेगु लागिं उमिसं 'काँठ राज्य संघर्ष समिति' हे गठन यानाः पलाः न्ह्याका हःगु दु।
थुकिया निंतिं उमिसं थःगु प्रभावय् दुगु सञ्चार माध्यमयात ल्हातय् कयाः थःपिनि खँ प्रचार याकेगु तयारी नं न्ह्याकेधुंकूगु दु ।

सूत्रतय्सं बिउगु जानकारी कथं थुमिसं आः याकनं हे थःपिनि खँय् ध्यानाकर्षण जुइमाः धकाः सभामुखयात नापलानाः ज्ञापनपत्र बीगु नं तयारी यानाच्वंगु दु ।

सु दु थुकिया लिउने ?

थौंकन्हय् काँठ राज्यया माग यानाः न्ह्यःने वयाच्वंपिं मनूत खास परिचय दुपिं मखुसां उमिगु लिउने धाःसा थीथी तःधंगु राजनीतिक पार्टी दुनेया प्रभावशाली खस ब्रम्हू नेतात हे लगे जुयाच्वंगु खँ नं सूत्रं धाःगु दु। थुमित नेपाली कांग्रेस, एमाले व छुं छुं माओवादी दुनेया ब्रम्हू नेतातय्सं समेत ग्वाकाच्वंगु खँ नं धाःगु दु ।

थ्व झ्वलय् तःधंगु पार्टीया खस ब्रम्हू नेतात छथाय् च्वनाः नं तःगू मछि चरणय् सहलह ब्याकेधुंकूगु दुसा थुमिसं हे सञ्चार, प्रशासन व राजनीतिक निकाय तक वनेगु च्यानल मिले याना बीगु यानाच्वंगु दु ।

नेवाः राज्य घोषणा जुल धाःसा अन दुने थःपिनि राजनीतिक स्थिति छु जुइ धइगु खँयात कयाः उमि दथुइ तःगू चरणय् खँ ब्याकेधुंकूगु दु ।

सूत्रं धाः कथं थ्व खास यानाः नेवाः स्वायत्त राज्यया विरोधय् हे पिहां वयेगु लागिं जुयाच्वंगु तयारी खः। काँठ लागाया खस ब्रम्हूतय्सं थ्व भूमिइ थःपिं नं न्हापांनिसें च्वंच्वनापिं जूगुलिं नेवाःतय् प्रदेश दुने थःपिं छाय् च्वनेगु धइकथंया सः तयेगु कुतः यानाच्वंगु दु ।