मेजरया सजाय व प्रधानमन्त्रीया उजं

चाडय् शान्ति सेनाया अधिकृत जुयाः वंम्ह नेपाली सेनाया मेजर निरंजन बस्नेतयात सर्वोच्च अदातलय् पेश यायेगु लाकि सैनिक अदालतय् पेश यायेगु धइगु खँयात कयाः प्रधानमन्त्री व रक्षा मन्त्री दथुइ तनाव ब्वलंगु दु। प्रधानमन्त्रीं वयात सर्वोच्च अदालतय् पेश याकि धकाः निर्देशन बिउगु दुसां रक्षा मन्त्रीं सैनिक अदालतय् हे पेश यायेमाः धकाः प्रमया निर्देशनयात अपहेलना याःगु दु ।

मैना सुनार छम्ह गैर सैनिक नागरिक जूगुलिं वयात स्याःपिं सैनिकतय्त सैनिक अदालतय् तयाः मखु नागरिक अदालतय् तयाः सजाय न्यंकेमाःगु खः। ऐनय् नं थ्व व्यवस्था दु। नागरिकया हत्या याइम्ह सैनिकयात नागरिकं हे सजाय बीमाः। थ्व नं नागरिक सर्वोच्चताया हे छगू अंग खः। तर वयात सेनां हे सजाय बीगु धकाः हानं छक्वः बचे यायेगु ज्या जुयाच्वंगु दु। मैना सुनार प्रकरणय् सैनिक अदालतं सजाय बिल धाःपिं मेपिं स्वम्ह सैनिक अधिकृत थौंकन्हय् नेपाः व अमेरिकाय् खुल्ला रुपं चाःहिलाच्वंगु दु। उमित सेवां अवकास बीगु बाहेक मेगु छुं हे दण्ड मबिउ। आः निरंजन बस्नेतयात राष्ट्र संघं हे लित छ्वया हःगु जूगुलिं यदि नेपाली सेनां वयात हानं बचे यायेगु कुतः यात धाःसा शान्ति सेनाय् नेपाःया सहभागितायात कयाः हे राष्ट्र संघं न्ह्यसः तयेफु ।

गन तक थुकिया बारे प्रधानमन्त्रीं बिउगु निर्देशनयात रक्षा मन्त्रीं पालना मयाःगु खँ दु, प्रधानमन्त्रीय प्रणालीइ थःगु निर्देशन पालना मयाइम्ह मन्त्रीयात या त प्रधानमन्त्रीं लिकया छ्वयेमाः, कि मखुसा थम्हं राजीनामा बीमाः। यदि थ्व नितां मजुइगु खःसा थ्व संसदीय व्यवस्था मखु देशय् मदुगु अव्यवस्था जक जुइ। सरकार हे अव्यवस्था सिर्जना यायेगुली लगे जुयाच्वंगु जुइ ।

More Stories Like this