नेवाः राज्ययात नेवाः जातीय खलः पुचःया मंकाः प्रतिवद्धता

दस्तावेज

नेपाःया छगू मू आदिवासी जनजाति नेवाःतय् प्रति म्हिगःया एकात्मक, केन्द्रीकृत व सामन्ती राजतन्त्रात्मक राज्यसत्तापाखें साम्प्रदायिक नीति नालाः जातीय, भाषिक, सांस्कृतिक, सामाजिकया नापनापं राजनीतिक व आर्थिक रुपय् विभेदपूर्ण व उत्पीडनया ब्यवहार याना वयाच्वंगु खायात लुमंकुसें,

वंगु निसःत्या दँ व उकिया न्ह्यवंनिसेंया राज्यसत्ता व राजनीतिक हिउपाःपाखें नेवाःतय् दुनेया जात, जाति, समुदाय व थीथी वर्गया हक, अधिकारयात गुगुं नं कथं सुनिश्चित यायेमफुगु यथार्थयात नुगलय् तसें,
राज्यया विभेदकारी नीति व उत्पीडनपाखें मुक्ति व समान अधिकार प्राप्तिया तातुसें नेवाःतय्सं तःदँ न्ह्यवंनिसें शान्तिपूर्ण अले सशस्त्र आन्दोलनय् ब्वति कयाः न्ह्यथना वयाच्वंगु थीथी मागयात खः कथं संवोधन यायेगु पाय्छिगु राजनीतिक लँपु धइगु हे संविधानसभापाखें न्हूगु संविधान च्वयेगु व उकिया हे लिधंसाय् नेवाः स्वायत्त राज्यया अधिकारयात सुनिश्चित यायेगु आवश्यक जूगुलिं,

नेपाःया राज्यसत्ता संघीय लोकतान्त्रिक गणतन्त्रया ल्याखं न्हूधाः जुइत स्वयाच्वंगु थौंया इलय् सकल नेवाःत छप्पँ व छधी जुसें प्राचीन नेपालमण्डल लागा दुने स्वशासनया अधिकार दुगु नेवाः स्वायत्त राज्य धस्वाकेगु तातुनाः नेवाः स्वायत्त राज्य मंकाः संघर्ष समितिया ध्वाँय् क्वय् आन्दोलित जुयाच्वंगु खँयात वाःचायेकाः,

सकल नेवाःत सांस्कृतिक, भाषिक अले भावनात्मक ल्याखं छप्पँ छधी खः, थःगु मूल्य व मान्यतायात धस्वाका तयेगु निंतिं सकलया उतिग्यंक भाला दु धइगु खँयात नाला कासें,
नेवाःतय् एकता व नेपाः देय्या राष्ट्रिय स्वतन्त्रता, स्वाधिनता, सार्वभौमिकता, भौगोलिक अखण्डता व अविभाज्यतायात धस्वाका तयेगुली बः बिसें,

संविधानसभाय् दुथ्याःपिं नेवाः सभासद्पिंसं ४ कछलाथ्वः ११३० (५ कात्तिक २०६६) कुन्हु संघीय लोकतान्त्रिक गणतन्त्र नेपाः दुने आत्मनिर्णयया अधिकार, अग्राधिकार, जातीय स्वशासन अधिकार नापंया स्वायत्तता, राज्यय् समानुपातिक प्रतिनिधित्व धइगु मुद्दायात न्ह्यथनाः मंकाः कथं क्यंगु प्रतिवद्धताय् ऐक्यबद्धता क्यँसें,

नेवाः समुदाय दुनेया थीथी जात जातिया आधिकारिक संघ संस्थाया नायःपिनिपाखें मंकाः कथं थ्व प्रतिवद्धता प्वंकागु जुल,

- नेपाःयात संघीय लोकतान्त्रिक व समावेशी गणतन्त्र देय् कथं धस्वाकेत संविधानसभापाखें क्वःछिनातःगु ईया दुने देय्या न्हूगु संविधान च्वकेगु ज्याय् नेवाः दुनेया थःथःगु जात समुदायपाखें माःगु सकारात्मक भूमिका म्हितेत,

- नेवाःतय् हक, अधिकार धस्वाकेगु नितिं थःगु जीवन फ्यानावंपिं सकलया कुतः व त्याग अले बलिदानयात सितिं मछ्वयेत,

- सकल नेवाःतय् तातुना कथं प्राचीन नेपालमण्डल लागा दुने नेवाःतय् ल्याः उप्वः दुगु फुक्क थाय् दुथ्याकाः आत्मनिर्णयया अधिकार व जातीय स्वशासनया अधिकार दुगु नेवाः स्वायत्त राज्य धस्वाकाः आदिवासी नेवाःतय् अधिकारयात सुनिश्चित यायेत,

- नेपाः देय् दुनेया गुगुं नं कथंया विभेद, असमानता मदुगु छगू आदर्शमयी नेवाः स्वायत्त राज्य नीस्वनेत,

- संविधानसभा थुज्वःगु राजनीतिक अवसरयात नेवाःतय् हक, अधिकार सुनिश्चित यायेगु नेवाः समुदायया सकल जात समुदायया ऐतिहासिक दायित्व पूवंकेत,
नेवाः समुदायया थीथी जात खलःयापिं छप्पँ व छधी जुसें नेवाः स्वायत्त राज्यया हक, अधिकार स्थापित यायेत सकलें जानाः माःगु इलय् माःगु पलाः छीत सहमत जुयागु जुल।

(वंगु थिंलागाः ११, ११३० (डिसेम्बर, १२, २००९) कुन्हु येँया बसन्तपुली छगू सार्वजनिक ज्याझ्वःया दथुइ प्वंकूगु प्रतिवद्धता)

More Stories Like this