खिचापुजा लुमनी

नर्मदेश्वर प्रधान

''थौंकन्हय् छु जू छु जू ! स्वांमाः खन कि हे तं पिहांवइगु। कयाकियाः चुं चुं थना बी। ह्वला बी। मतिइ वइ। अझ ला स्वांमाः गुलि तत्याः जुइ, ताहाः जुइ जिगु तं नं उकथं हे थहां वनी। तीव्र जुइ। छाय् थें स्वांमाः कल्पनाय् तक नं लुमंके मास्ते मवः ।''

पासा महन्तराजं स्वांमाःयात खूब कुंखिनी। विरोध याइ। जि आश्चर्यचकित जुइ। गज्याःम्ह अःखःम्ह मनू ! महन्तराज ! स्वांमाः सौन्दर्य, शुभकार्यया चिं खः। विजयोत्सवया छुमां। भिंगु ज्या, बांलाःगु ज्याय् स्वांमाः मदयेकं मगाः। स्वयम्बर। ह्वंकीबलय् स्वांमाःया हे महत्व जुयाच्वनी। मिजनं मिसायात। मिसां मिजंयात स्वांमाः क्वखायेकी। विवाह बन्धनय् लाइ। जीवन पासा जुइ। स्वांमाः थुज्वःगु सौन्दर्य, सांस्कृतिया प्रतीक। स्वांमाः खनेवं महन्तराजजीयात छाय् पारु चढे जुइगु? छाय् पालितलंनिसें मि छ्वइगु? स्वांया नां काल कि हे व छाय् वाय् चाइगु? स्वांमाप्रति पासाया विकर्षण। अनुभव याये ! छाय्? तर जिं वइत न्ह्यसः मतया। स्वांमाः भिंगु ज्याय् छ्यली। सकस्यां सिउ। महन्तराज नं थ्व खाया अनभिज्ञ मखु। स्वांमाःप्रतिया वयागु विराग ! थ्वया लिउने छुं कारण दु ला? व छु जुइ? जितः सीके मास्तेवइ। वइके स्वांमाः प्रति घृणा लूगु छुं दुर्घटनावश जुइमाः। स्वांमाःपाखें छुं मभिं जूगु दयेमाः। अशुभ जूगु जुइमाः। उकिं हे मखा जुइ स्वांमाःया नां काये मयःगु वयात। छन्हुया खा। महन्तराज ! जिथाय् वइ। टिभी स्वइ। अचानक व हालाहइ, ''स्वांमाः ! स्व स्व ! का चफु स्वांमाः। चुं चुं या। ह्वला बिउथ्वयात मसानय्। स्वांमाः मखु व। नरमुण्डया माः खः व।'' टिभी समाचारय् गःपः त्वपुक्क स्वांमाः क्वखायाच्वंम्ह छम्ह नेता खनी। स्वस्वं महन्तराज चिल्लाय् दना हइ। ''स्व स्व स्वांमाः। चफु। धू या। स्वांमाःयात..'' टिभीइ नेताया गःपः जाय्क स्वांमाः खनी। महन्तराज हीमी चाइ। स्वांमाः लिसेया वया तं दासि वइ। घृणा पिज्वइ। जिं थुइ। तःन्हु न्ह्यवंनिसें लुइकेत स्वइगु लिसः। थौं लुइ। जिगु जिज्ञासा शान्त जुइ। महन्तराजया थें नेताया स्वांमाः स्वयाः जिके तं ला मवः। तर जिं नं चाः, स्वांमाःयात देशया विद्यमान राजनीतिं रंगे याना बिउगु दु। स्वांमाः थौं सौन्दर्यया प्रतीक मखु। कुत्सित राजनैतिक खेलया तिसा जुयाः लुइ। शायद महन्तराजं स्वांमाःप्रति नफरत थ्वहे कारणं क्यंगु जुइमाः। जिं अनुमान याये। थौंकन्हय् देशया नेतात स्वांमाः क्वखायेगु धेंधेंबल्लाः कासाय् सक्रिय जुयाच्वंगु खनेदु। फयां फक्व ताःहाकःगु, किलो का किलो फ्यातुगु स्वांमाः क्वखायाः श्रेष्ठता प्रदर्शन यायेगु। थुज्वःगु प्रतिस्पर्धाय् थौं देय्या नेतात दुनाच्वंगु दु। भारत भ्रमणं लिहां वइ। टिभी खनेदइ, नेताया गःपः जाय्क भव्य स्वांमाः। मानौं एभरेष्ट च्वकाय् थ्यंकः वःम्ह पर्वतारोही थें। थ्व छाय्? धार्मिक कार्यक्रम? स्वागत समारोह? वा उद्घाटन कार्यक्रम? नेतातय् गःपतय् स्वांमाः जायेकेगु धेंधेंबल्लाः खनेदइ। नेतातसें थुज्वःगु विलासिताया आनन्द काइ। अनावश्यक तायेकी मखु। झं मख्ख जुइ। फूर्ति याइ। स्वांमाःया नं मर्यादा दइ। वयागु छ्यलाया ई दइ। परिस्थिति दइ। विजयोत्सव जुइमाः। छुं पर्व वयेमाः। विशेष उपलब्धिया अवस्था जुइमाः। स्वांया औचित्य दइ। स्वांया दुरुपयोगं कःतिया ज्या याये यः। फइगु ल्हाः द्यना बीयः। क्वखाइगु गःपः ध्यना बी यः। नेतातसें थ्व खा सीकेमाः, चायेकेमाः ।

देश झं झं स्यना वनाच्वन। ''देश डुबे जुइन।'' नेतातसें पलाः पतिकं जनतायात ख्वाइ। यायेफुगु छुं मखु। स्वांमाः क्वखायेगु मोहं ग्रस्त जुइ। देशयात असफल राष्ट्र यायेगु कासाय् थौं नेतात सफल। विजय मालाप्रति इमिगु तृष्णा, आशक्ति खने दइ। नेतातय् गःतपय् स्वांमाः दइ। खिचापुजा लुमनी। गःपतय् स्वांमाः घानाः उखेंथुखें जुयाच्वंपिं खिचात न्ह्यःने दं वइ !

More Stories Like this