मंकाः संकल्पय् सहमति जुल
कन्हय् अन्तिम रुप बियाः सार्वजनिक याइगु
येँ (सन्ध्या टाइम्स)/राजनीतिक गतिरोध अन्त्य यायेगु नितिं एनेकपा (माओवादी), नेपाली कांग्रेस व नेकपा (एमाले)या शीर्ष नेतातय्सं कन्हय् तकया दुने मंकाः संकल्प प्रस्ताव तयार याइगु जूगु दु ।
प्रधानमन्त्री ज्याकू सिंहदरवारय् थौं सुथय् च्वंगु स्वंगू दलया शीर्ष नेतातय्गु बैठकं मंकाः संकल्प प्रस्तावयात थ्यंमथ्यं अन्तिम रुप बिउगु खँ धाःगु दु। कन्हय् उकियात क्वचायेकीगु ग्वसाः दु ।
संकल्प प्रस्तावया भाषा गय् यानाः दयेकल धइगु खँ धाःसा सी मदुनि। एमालेया महासचिव ईश्वर पोखरेलं कनादी कथं प्रस्तावया भाषा 'आलंकारिक राष्ट्रपति व कार्यकारी मन्त्रिपरिषद्या ज्याखँय् न्हापा थें अन्यौल मवइ कथं न्हूगु संविधानय् प्रस्ट यायेत संकल्प याना' धइगु स्पिरिटय् च्वयातःगु दु ।
मुँज्याय् कांग्रेस व एमाले नेतातय्सं राष्ट्रपति व कार्यकारी प्रधानमन्त्री निम्हेस्यां नं कमी कमजोरीं अन्यौलता ब्वलंगुलिं आवंलि अथे मजुइकेगु मंकाः सहमति यानाः मंकाः प्रतिवद्धता संसदय् यंकेगु खँ तःगु खःसा थुकी हे सहमति जूगुलिं आः कन्हय् स्वंगुलिं पार्टीया शीर्ष नेतात सहित कार्यदलया बैठक च्वनाः अन्तिम रुप बीगु धाःगु दु।
अथे हे आलंकारिक राष्ट्रपति व कार्यकारी प्रधानमन्त्रीया कार्यक्षेत्र स्पष्ट यायेत संविधान संशोधनया लँपु चायेकेगु खँय् नं स्वंगू दलया नेतातय् दथुइ सहमति जूगु खँ धाःगु दु।
थौं च्वंगु मुँज्याय् प्रधानमन्त्री माधव नेपाल, एनेकपा (माओवादी) या नायः प्रचण्ड, नेपाली कांग्रेसया कार्यवाहक सभापति सुशिल कोइराला, एमालेया नेता भरतमोहन अधिकारी व ईश्वर पोखरेलपिंसं ब्वति कयादीगु खः।
कन्हय् एमालेया झलनाथ खनाल, माओवादीया प्रचण्ड व कांग्रेसया सुशील कोइराला नापं कार्यदलया दुजःत समेतया मंकाः बैठक च्वनीगु खँ दु ।
प्रधानसेनापतियात चीकेगु ज्यायात राष्ट्रपतिं पना बिउगु कारणं देशय् राजनीतिक गतिरोध ब्वलंगु खःसा वहे कारणं माओवादीं स्वला न्ह्यवंनिसें संसद तकं चले याके मबियाच्वंगु खः। समस्या ज्यन कि सदन नं सुचारु जुइ ।
