भारतय् न्हून्हूगु राज्यया निंतिं हानं आन्दोलन

भारतया आन्ध्र प्रदेश राज्ययात कुचा यानाः तेलंगाना नांगु न्हूगु राज्य दयेकेगु स्वीकृति केन्द्र सरकारं बीवं उकिया विरोध व समर्थनय् अन ततःधंगु प्रदर्शनीत जुयाच्वंगु दु। तेलंगाना राज्य बी मजिउ धाइपिं आन्ध्र प्रदेशया मन्त्री व सभासद्तय्सं समेत राजीनामा बिया हःगु दुसा मेखे आन्ध्र प्रदेश कुचा यानाः निगू राज्य दयेके जिउसा जिमिगु जक छाय् दयेके मजिउ धकाः गोरखाल्याण्ड, बुन्डेलखण्ड, पूर्वाञ्चल आदि राज्य नं खडा यायेमाःगु माग यासें अन आन्दोलन शुरु जूगु दु। भारतय् आः थथें झिगू न्हूगु राज्य दयेकेमाःगु सः थ्वयाच्वंगु दु। अन छक्वलं थीथी राज्य दयेकेमाल धकाः थ्वयेकाहःगु सः न्यनाः नेपाःया संघीय प्रणाली विरोधीतय्सं नं शायद उकियात हे उदाहरण दयेकाः संघीय प्रणाली छाय् मजिउ धकाः आः भाषण याना हइगु जुइ
।

भारत अर्ध संघीय प्रणाली दुगु देय् खःसा अन दयेकातःगु प्रदेशतय् आकार तसकं तःधं। गुलिखे तःधंगु प्रदेशत ला नेपाः सिबें नं तकू। तःधंगु प्रदेश दुने सुशासन नं बांलाक मदु धाःसां जिउ। उकिया तुलनाय् चीधंगु प्रदेशतय्सं बांलाक ज्या यानाच्वंगु दु। शायद अथे हे जुयाः जुइमाः उत्तर प्रदेशया मुख्य मन्त्री मायादेवीं उत्तर प्रदेश कुचा यानाः बुन्डेलखण्ड राज्य दयेकेमाः धकाः वयाच्वंगु मागयात समर्थन याःगु दु। यदि केन्द्र उत्तर प्रदेश विभाजन यानाः न्हूगु राज्य दयेकेगु निर्णय यात धाःसा उकियात थःपिंसं समर्थन यायेगु धकाः मायादेवीं केन्द्रयात पौ नापं बियाछ्वःगु दु। अलग्ग राज्य दयेकाः च्वनेगु जनताया अधिकार खः। यक्व प्रदेश दइगु समस्या मखु, उकिया सञ्चालन बांलाक जुइ लाकि जुइ मखु, वहे जक ध्यान बीमाःगु विषय खः ।

More Stories Like this