सामाजिक विकृतिं दयेकी बदमास मखुपिंत नं बदमास

कृष्ण

सुनसान। तसकं खिउँगु क्वथा। केवल झ्याःया चिप्वाःगु प्वालं जः दुहां वयाच्वंगु दु। तसकं हे ग्यानापुसेच्वंगु क्वथा। गन ३०/४० दँ ति दुपिं प्यम्ह ल्याय्म्हतय्त सास्तीपूर्वक कुनातःगु दइ प्रहरी निरीक्षक सुरेन्द्र तुलाधरं। उगु हे क्वथां (जेलं) प्यम्हं ल्याय्म्हतय्सं जेलया प्यंगुलिं पःखाः हे थ्वयेक छसलं हे 'जिपिं बदमास मखु ! जिपिं बदमास मखु !' धकाः प्रतिकार याइ। थ्वहे सःपाखें शुरु जुइ नेपालभाषाया संकिपा 'जिपिं बदमास मखु ।'

चिराग फिल्म प्रोडक्शनया न्ह्यब्वया कथं दयेकूगु उगु संकिपां ल्याय्म्हत लजगाः मदयेवं व नेतृत्व पक्ष सवल मजुइगु इलय् यःसां मयःसां विकृति व विसंगतिइ गथे फँसे जू वनी व अज्याःपिं ल्याय्म्हतपाखें खराब तत्वतय्सं गज्याःगु फाइदा काइ धइगु खँयात बांलाक प्रस्तुत यानातःगु दु।
समाजसेवी व राजनीतिक नेताया ख्वाःपालं पुनाः ल्याय्म्ह पुस्तायात लागू पदार्थया दुर्ब्यसनीइ फँसे यायेगु व मूर्ति खुइत बाध्य याइम्ह खलपात्रया भूमिका म्हितेत अमृतमान महर्जन ताःलाःगु दु। समाजय् विद्यमान अज्याःगु कुतत्वयात उन्मूलन यायेत लगे जुइबलय् वइगु दुःख, पीडा, कठिनाई व थीथी द्वपंया सामना यायेत स्वयाच्वनी प्यम्ह ल्याय्म्हत हरिकृष्ण तण्डुकार, स्वतन्त्र महर्जन, राजु महर्जन व भोगेन्द्र मानन्धर। लिच्वः कथं छन्हु छम्ह मिसाया हत्याया मखुगु द्वपनय् थ्व प्यम्हं ल्याय्म्हत जेलय् लाइ ।

ल्याय्म्ह शक्ति धइगु हे परिवर्तनया बाहक व राष्ट्रया थां खः धइगु शिक्षा क्वबियाच्वंगु उगु संकिपां निघौया ईयात उपयोग यासें हास्य रसयात नं उलि हे थाय् बियातःगु खनेदु। राजु महर्जन, श्यामसुन्दर शिल्पकार व हरिमान दिवाकरं हास्यपात्रया सफल भूमिका म्हितूगु दुसा अर्णेश्वरी शिल्पकारं थः काय व भिंतुना जोशीया दथुइ जुयाच्वंगु मतिना ब्वलंकेत लभगुरुया भूमिका नं स्याचुक हे म्हितादीगु दु। मेम्ह नायिका दिपा शाक्यया फाइट शट हिरोतय् फाइट स्वयां म्हो मजू। अबु जुया म्हितूम्ह महन्तलाल मल्लया अभिनयं स्वकुमितय् मिखां ख्वबि हायेका बिउ ।

अप्वः खोनाय् आउटडोर शुटिङ्ग यानातःगु उगु संकिपाय् सांस्कृतिक धरोहरयात कैद याये मफुगु कमजोरी पक्ष खः। अथे खःसां म्हो लागतय् उलि तःजिगु फिल्म दयेकेफुगु धाःसा तारिफ याये बहःगु पक्ष खः ।

दृश्य समायोजन व म्युजिक समायोजनं संकिपायात अझ बल बिउगु दु। अप्वः खर्च यानातःगु गुगुं हिन्दी फिल्म वा खय् भाय्या फिल्म स्वयां थ्व म्हो मजू। द्वन्द्व व हास्यं जाःगु थ्व फिल्मया अन्त्यय् सदां सत्यया जित जुइ धइगु सन्देश बियातःगु दु ।

सुरेन्द्र तुलाधरया लेखन व निर्देशनय् तयार जूगु थुगु संकिपाय् छायाँकन सुरेश बज्राचार्य, बाखं हरिकृष्ण तण्डुकार, सम्पादन सुनिलकृष्ण ताम्राकार, नृत्य भोगेन्द्र मानन्धर, संगीत कीर्ति व विजय, द्वन्द्व सूर्यदेव व निर्माण शुभ तण्डुकार व पूजा श्रेष्ठं यानादीगु दुसा अमृतकृष्ण श्रेष्ठ व सरोज महर्जनया अभिनय नं उलि हे बांलाः जू। समग्रय् थुकियात नेवाः फिल्म ख्यलय् छगू मुक्कं न्हूगु सवाः ज्वनाः पिलू वःगु फिल्म धाये छिं ।

More Stories Like this