राष्ट्रवादी अडानं जक देय् बचे जुइ

डी. आर खड्गी

माओवादीया सर्वोच्च नेता प्रचण्डं लडाकुतय्गु शिविरय् कार्यनीति व राजनीतिया बारे भाषण बीगु झ्वलय् थथे धयादिल, 'सोभियत संघया नेता लेनिनया नेतृत्वय् जारशाही विरुद्ध संघर्ष यानाच्वंगु इलय् मार्क्सवादी सिद्धान्तया खँ ल्ह्वनाः जनता संघर्षय् कुहां मवः। जब सिद्धान्तया खँ त्वःताः जनतायात माःगु नयेगु, त्वनेगु, पुनेगु व छेँया व्यवस्था याना बी धायेसातकि सारा जनतां साथ बिल, क्रान्ति नं सफल जुल ।'

नेपाःया माओवादी पार्टीं नं जनयुद्धया इलय् मार्क्स लेनिनया बिचाः जक कनां जनता प्रभावित मजू। जब सिद्धान्तया खँ त्वःताः जातीयताया लिधंसाय् राज्य दयेकेगु अधिकार बी धया तब बहुसंख्यक आदिवासी जनजातिं नं साथ बिउगु खँ वय्कलं कनादिल ।

विश्वया आपालं तानाशाहीतय्सं जनताया समर्थन कायेगु लागि फय्गं खँ मल्ह्वगु मखु। फय्गं खँ ल्ह्वनाः जनताया साथ कयाः सत्ताय् च्वनेत सफल जुल। हानं वहे साथ बियाच्वंपिं जनतायात हे घोर शोषण व अपमान नं शुरु यात। देशभक्त व जनता प्रति जिम्मेवारी काइपिं नेतातय्सं जूसा म्हुतुं छु धाइ ज्यां नं व पूरा यानां त्वःती। दसुया लागिं सोभियत संघया नेता लेनिनं क्रान्तिया इलय् जनताया नयेगु, त्वनेगु, पुनेगु व छेँया व्यवस्था पूरा यायेगु बचं बिल। लेनिनया ल्हातय् सत्ता वयेवं नयेगु, त्वनेगु, पुनेगु व्यवस्था पूरा यानाः सोभियत संघयात शक्तिशाली देय् नं दयेकां त्वःतल। नेपाःया माओवादीं बहुसंख्यक आदिवासी जनजातिया समर्थन व सहयोग कायेगु लागिं जातीय नारा बियाः जनयुद्ध व जन आन्दोलनय् सहभागी याकाः सत्ताय् तक थ्यन। तर थौंकन्हय् वहे जातीय नारां माओवादीया कपाः स्याकाच्वंगु दु। बहुसंख्यक आदिवासी जनजातिं माओवादी पार्टीयात शंकाया मिखां स्वयेगु याना हयाच्वंगु दु। छाय्धाःसां बहुसंख्यक आदिवासी जनजातिया अवस्था न्हापा छु दु आः नं वहे स्थिति जक मखु अझ महंगीं यानाः तःधंगु मारय् लानाच्वंगु दु। उकिं माओवादी नं आः होशियार जुया वःगु दु। आः जनजातितय्सं पार्टीयात साथ बीगु त्वःताः विद्रोह याइ ला धकाः जातीय नारा कम्युनिष्ट सिद्धान्तय् मदु धकाः थ्व पार्टीया बुद्धिजीवीतय्सं धायेगु शुरु यानाहल। स्वयम् माओवादीया नेतातय्सं तकं जातीय नारा साम्राज्यवादीतय् नारा खः धायेगु यानाच्वंगु दु। खसब्रम्हू नेतात गुलि चतुर धयागु खँ माओवादीया नेतातय्सं नं क्यना हःगु दु। माओवादी पार्टीं जातीय नारा बियाः देय्न्यंकं संगठन यानाः जनताया समर्थन कायेत सफल ला जुल, आः वयाः थ्वहे पार्टीं जातीयता मखु राष्ट्रियताया आधारय् संघीय राज्य निर्माण यायेगु जुइ धकाः न्ववाना हयाच्वंगु दु ।

खसब्रम्हूतय्गु चलाकी नीति आः जक जुयाच्वंगु मखु पंचायती इलंनिसें जुयाच्वंगु खः। जब देशय् मछिंगु स्थिति वइ व इलय् गैर खसतय्त न्ह्यःने हयाः ढालया रुपय् प्रयोग यानाच्वनी। दसुया लागिं पञ्चायत इलय् मदुम्ह जोगमेहर श्रेष्ठ, मदुम्ह केदारमान व्यथित व मेमेपिं नेवाःतय्त प्रयोग यात। जब देशया संकटकाल चिलाः सहज वातावरण सिर्जना जुल हानं नेवाःतय्त चीकाः खसब्रम्हूतय्सं हे राज याः वल। २०४६ साल धुंकाः नं कांग्रेस व एमाले पार्टीयात मछिंगु अवस्थाय् नेवाः नेतात न्ह्यःने हयाः ज्या काल लिपा हानं नेवाः नेतातय्त बाइपास यानाः खसब्रम्हूतय्सं हे मस्ती यात। आः माओवादी पार्टीं नं वहे नीति अबलम्बन यानाच्वंगु दु। थौंया इलय् माओवादी पार्टी नं मछिंगु स्थितिइ लानाच्वंगु दु। छाय्धाःसां जनयुद्धया इलय् जातीय नारा बियाः आदिवासी जनजातितय्त ल्हातय् कयाः उपयोग यात। आः जातीय राज्य निर्माण जुल कि साम्प्रदायिक अवस्था सृजना जुइगु उमिसं खंका हःगु दु। छगू जाति मेगु जाति विरुद्ध वनाः साम्प्रदायिक दंगा जुयाः देय् हे कुचाकुचा जुइगु तर्क तकं उमिसं बियाच्वंगु दु। स्वयम माओवादीया खस नेतातय्सं तकं प्रत्यक्ष वा अप्रत्यक्षरुपं जातीय राज्यया विरोध यानाच्वंगु खनेदु। थुगुसी खसब्रम्हू नेतातय्सं नेवाः नेतातय्त न्ह्यःने महसे देव गुरुङ्गयात न्ह्यःने हयाः जातीय राज्यया विरोध याकाच्वंगु दु। देव गुरुङ्गं खुल्ला रुपं हे धायेधुंकूगु दु जातीय राज्य मखु राष्ट्रियताया आधारय् संघीयता वनेगु जुइ धकाः। माओवादी पार्टीं जातीयताया लिधंसाय् संघीयताय् वनेगु कुतः याइ कि राष्ट्रियताया लिधंसाय् संघीयताय् वनीगु खः, थ्व स्वयेगु ल्यं हे दनि। तर छता खँ स्पष्ट जुल धायेमाः, व खः बहुसंख्यक आदिवासी जनजाति व मेमेपिं कमजोर वर्गय् नं राजनीतिक चेतनाया स्तर यक्व थहां वयेधुंकूगु दु। न्हापा न्हापा जूसा खसब्रम्हू नेतातय्सं याउँक हे जनतायात भ्रमय् तइगु। थौंकन्हय् खसब्रम्हूपाखें न्हापा न्हापा थें जनतायात भ्रमय् तयेत थाकुयाच्वंगु दु ।

गुलि ठक्कर नइ उलि चेतना अप्वया वइगु स्वाभाविक खः। खसब्रम्हू नेतातपाखं यक्व धोका नये धुंकूगुलिं खसब्रम्हूप्रति स्वयेगु जनताया दृष्टिकोण हे नकारात्मक जुइधुंकल। खसब्रम्हू नेतातय्गु उद्देश्य आः नं परिवर्तन जूगु खनेमदु। छाय्धाःसां आः नं उमिगु सोच जनतायात झंगः लानाः थःगु जातिं जक रजाइँ यानाच्वने धइगु हे दनि। दसुया लागिं १५, २० प्रतिशत दुपिं खसब्रम्हूपाखे ९० प्रतिशत नेपाःया प्रशासनिक क्षेत्र कब्जा यानाच्वंगु दु। झीगु विरोध कम प्रतिशतं ९० प्रतिशत प्रशासन कब्जा यानाच्वंगुली मखु, झीगु विरोध १५ प्रतिशतं थःत जक स्वयाः देय् बर्बाद यानाः देय्या सम्पत्ति लुटे यानाच्वंगुलिं खः। अझ खसब्रम्हू नेतात स्वयां बिहारी मूलया नेतात भयानक खनेदु। तराईयात छुटे याये मफुतले नेपाःया उच्च पदय् च्वनाः देशयात कंगाल यायेगु खः। बिहारी मूलया नेता शक्तिशाली जूगु कारणं नं खसब्रम्हू नेतात दिल्ली दरबार वनाः १२ बुँदे सम्झौता याना वःगुलिं खः। १२ बुँदा यानाः बिहारी मूलया नेतात अप्वः मन्त्री जुयाः मन्त्रालय व विभागय् बिहारीतय्त भरे यानाच्वंगु दु। यदि आः सचेत जुइ मफुत धाःसा नेपाःया प्रशासन क्षेत्र बिहारी नागरिक दुहां वयाः देय्या अस्तित्व तकं समाप्त जुइफु। अथे जूगुलिं खस नेतात सकारात्मक जुयाः देशभक्त अडान कयाः फुक्क जनताया साथ कयाः नेपाःयात अर्ध औपनिवेशक व अर्ध सामन्ती अवस्थां मुक्त यायेगु स्वयेमाः ।

More Stories Like this