नेपाःया जर्नेलयात राष्ट्र संघपाखें कारवाही

शान्ति सेनाय् वंम्ह नेपाली सेनाया मेजर निरंजन बस्नेतयात मानवाधिकार हनन् याःगु द्वपं बियाः राष्ट्र संघं लित छ्वया हःगु दु। चादय् वंम्ह मेजर बस्नेतयात अन थ्यनेधुंकाः मानवाधिकार हनन्या केशय् ल्हाः दुगु द्वपं बियाः राष्ट्र संघं लित छ्वया हःगु खः। मैना सुनार हत्या काण्डय् मेजर बस्नेतया नं ल्हाः दुगु खःसां नेपाली सेनां मेपिंत कारवाही यानाः व छम्हेसित सफाई बिउगु खः। तर नेपालं सफाई बिउसां राष्ट्र संघं धाःसा नेपाःपाखें वयात बिउगु सफाई न्यायिक मजू धासें अपमानपूर्वक लित छ्वया हःगु दु। राष्ट्र संघं वयात याःगु कारवाही अतिकं च्वछायेबहः जू ।

मानवाधिकारया सवालय् नेपाली सेनाया छबी तसकं बांमलाः। खास यानाः जनयुद्धया इलय् नेपाली सेनां आपालं निर्दोष मनूतय्त यातना बीगु, स्यायेगु व लाश हे बेपत्ता यायेगु थेंज्याःगु आपालं ज्या याःगु दु। उकी मध्ये नं थज्याःगु ज्याया नेतृत्व याइपिं मेजर बस्नेत थेंज्याःपिं हे मनूत खः। तर थुमित नेपाःया सरकार व नेपाली सेनां कारवाही यायेगु ज्या धाःसा गबलें मजू। नेपालं कारवाही मयाःपिंत राष्ट्र संघं थःगु कथं कारवाही याःगु दु। थुकिं यानाः नेपाली सेनाय् हानं हानं थज्याःगु ज्या याइपिंत दुरुत्साहित याइगु आशा कायेफु। राष्ट्र संघं बस्नेतयात याःगु कारवाहीपाखें नेपाली सेनां याइगु कारवाही गुलि निष्पक्ष धइगु खँ नं उला बिउगु दु।
नेपाःया रक्षा मन्त्री थौंकन्हय् नेपाली सेनाया मनोबल थकायेमाः धकाः खुब सक्रिय जुयाच्वनादीगु दु। सेनाया मनोबल थकायेगु गलत ज्या ला मखु तर व सिबें न्ह्यः सेना दुने च्वंपिं थज्याःपिं मनूतय्त कारवाही यायेगुपाखे नं रक्षा मन्त्रीजुया ध्यान वनीगु खः ला ?

More Stories Like this