नेवाः राज्ययात समर्थन

येँ (सन्ध्या टाइम्स)/नेवाः स्वायत्त राज्य मंकाः संघर्ष समितिया इनापय् नेवाः स्वायत्त राज्यया निंतिं नेवाःतय् थीथी जातीय खलः पुचःपाखें मंकाः प्रतिवद्धता प्वंकेगु ज्याझ्वः म्हिगः बसन्तपुली जुल। उगु सार्वजनिक ज्याझ्वलय् थ्वहे वइगु पुस ११ गते जुइगु नेवाः स्वायत्त राज्य घोषणाया ज्याझ्वःयात नेपालमण्डल दुने च्वंपिं २७ गू नेवाः खलः पुचःतय्सं छक्वलं प्रतिबद्धता प्वंकूगु खः ।

नेपाः संघीय लोकतान्त्रिक गणतन्त्रय् वनेत्यंगु इलय् सकलें नेवाःत छधी जुयाः न्हूगु संविधानय् नेवाः स्वशासन सुनिश्चित यायेमाःगु माग तयाः नेवाः स्वायत्त राज्य मंकाः संघर्ष समितिं आन्दोलन याना वयाच्वंगु खः। ज्याझ्वलय् सकलें जातितय्सं अन व्यक्त याःगु प्रतिवद्धताय् संस्कृति, भाषा व भावनात्मक ल्याखं छधी जुइगु लागिं ऐक्यवद्धता प्वंकेगु खँ धयातःगु दु। अले थुकिं नेवाः एकता, स्वाधिनता, भौगोलिक अखण्डतायात नं तिबः बीगु खँ न्ह्यथनातःगु दु। नेवाः स्वायत्त राज्य दुने छुं नं कथंया विभेद व असमानता मतसे छगू आदर्शमयी राज्य जुइगु खँ नं उकी धयातःगु दु।
नेवाः स्वायत्त राज्य घोषणा थ्वहे वइगु पुस ११ गते येँया दशरथ रंगशालाय् छगू तःजिगु समारोहया दथुइ यायेत्यंगु दु। वकुन्हु नेवाः राष्ट्रिय ध्वाँय् ब्वयेकेगु व नेवाः राष्ट्रिय गान नं सार्वजनिक याइगु जानकारी अन बिउगु खः। नेपाः देय् दुने जुयाच्वंगु राजनैतिक हिउपाःपाखें नेवाःतय्गु जातीय समुदायया अधिकारयात सुनिश्चित यायेत नेवाः स्वायत्त राज्य घोषणा यायेमाःगु खँ धाःगु दु। संविधानसभाय् जुइगु छुं नं ज्याखँय् समानुपातिक रुपं प्रतिनिधित्व जुइ धकाः नं सकस्यां प्रतिबद्धता प्वंकूगु दु ।

ज्याझ्वःया ग्वसाः खलः नेवाः देय् दबूया नायः नरेश ताम्राकारया सभापतित्वय् जूगु उगु ज्याझ्वलय् नेपालमण्डलया फुक्कं नेवाः जातया पुचलं ब्वति काःगु खःसा वय्कःपिंत नेवाः स्वायत्त राज्य मंकाः संघर्ष समितिया नायः नरेन्द्रभक्त हाडां प्रतिवद्धता प्वंके बियादीगु खः ।

ज्याझ्वलय् नेवाः न्ह्यलुवा व संघर्ष समितिया दुजःपिं मल्ल के. सुन्दर, मोहनकृष्ण डंगोल, अनाररत्न वज्राचार्य, मनोज नेवाः खड्गी, माइलाबाबु द्यःला, लक्ष्मण राजवंशी, रामकाजी अवाले, गणेशराम प्रजापति आदिपिंसं न्ववानादीगु खः। ज्याझ्वलय् नेवाः सांस्कृतिक धिमे हुला प्याखं, कुमारी, वज्रयोगिनी आदि नं न्ह्यब्वःगु खः ।

ज्याझ्वलय् नेवाः समाज दुनेया उदाय, कपाली, कारन्जित, ज्यापु, तण्डुकार, द्यःला, ल्वहंकःमि, रजक, नकःमि, प्रजापति, वज्राचार्य, मानन्धर, माली, नापित, रंजितकार, राजोपाध्याय, राजकर्णिकार, शाक्य, स्यस्यः, बलामी, पुतुवार, ताम्राकार, स्थापित, कसाः, तुलाधर, गोपाली जातिया प्रतिनिधितय्सं ब्वति काःगु खः ।

More Stories Like this